Уул уурхайн сайд Р.Жигжид PDAC 2015 чуулга уулзалтад оролцож байна

Уул уурхайн сайд Р.Жигжид PDAC 2015 чуулга уулзалтад оролцож байна

Монгол Улсын Засгийн газрын гишүүн, Уул уурхайн сайд Р.Жигжид 2015 оны 3 дугаар сарын1-4-ний өдрүүдэд Канад Улсын Торонто хотноо зохион байгуулагдаж буй Уул уурхайн хайгуулагч, олборлогчдын PDAC чуулга уулзалтад оролцож байна.
 
Уул, уурхайн үйлдвэрлэлээрээ дэлхийд тэргүүлэгч Канадын Торонто хотноо жил бүр уламжлал болон зохион байгууллагддаг энэ чуулга уулзалтад 2015 онд 103 орны 25 мянга орчим төлөөлөгчид хуран цугларч энэ салбарын цаашдыг хөгжил,техник технологийн дэвшил, хөрөнгө оруулалтын зэрэг өргөн асуудлаар чуулж байна. Монгол Улс энэ арга хэмжээнд сүүлийн жилүүдэд тогтмол оролцож ирэв.       
 
Уул, уурхайн сайд Р.Жигжид Канад Улсын Сангийн сайд ноён Жо Оливер, Канадын парламентын Нийтийн танхимын гишүүн, Уул, уурхайн асуудал эрхэлсэн парламентын сайд хатагтай Келли Блок, Уул уурхайн хайгуулагч, олборлогчдын чуулга уулзалтын дарга Род Томас,Канадын парламентын Нийтийн танхимын гишүүн ноён Геоф Хоган, Чили Улсын  Уул уурхайн дэд сайд ноён Игнасил Моренос нартай тус тус уулзаж, Монгол Улсын эдийн засгийн тулгуур салбар болох уул, уурхай, хөрөнгө оруулалтын салбарт хөгжүүлж буй харилцаа, хамтын ажиллагааны талаар санал солилцож, ярилцав.
 
Уул, уурхайн сайд Р.Жигжид, Канадын Парламентын Нийтийн танхимын гишүүн, Уул, уурхайн асуудал эрхэлсэн парламентын сайд хатагтай Келли Блок нарын хийсэн уулзалтын үеэр Монгол, Канадын уул, уурхайн салбарын хамтын ажиллагааны өргөн хүрээтэй асуудлыг хэлэлцэв. Монгол Улсын Засгийн газраас сүүлийн хоёр жилийн хугацаанд авч хэрэгжүүлсэн уул, уурхайн салбарын эрх зүйн орчныг урт хугацаанд тогтвортой, тодорхой ойлгомжтой болгох, өрсөлдөх чадварыг бэхжүүлэх, хариуцлагатай уул, уурхайг хөгжүүлэх, улмаар энэ салбарт гадаадын хөрөнгө оруулагчидтай урт хугацааны харилцан ашигтай хамтын ажиллагааг хөгжүүлэх чиглэлээр хэрэгжүүлж буй арга хэмжээг танилцуулав. Канадын тал хоёр орны уул уурхайн салбарын хамтын ажиллагаанд сэтгэл хангалуун байгаагаа дурьдаж, Монгол Улсын уул уурхайн салбарыг хөгжлийг үргэлжлүүлэн дэмжихээ илэрхийлэв.
 
Монгол Улсын Уул уурхайн яам, Канад Улсын Байгалийн нөөцийн яам хоорондын хамтын ажиллагааны баримт бичигт Уул уурхайн сайд Р.Жигжид, Канадын Уул уурхайн асуудал эрхэлсэн парламентын сайд хатагтай Келли Блок нар гарын үсэг зурав. Хамтын ажиллагааны энэ баримт бичигт заасан хамтын үйл ажиллагааг хэрэгжүүлснээр Монгол Улсын уул уурхайн салбарын чадавхи, олборлох салбарын хариуцлага дээшилж, хамтын ажиллагаа цаашид илүү өргөжин хөгжих боломж бүрдэх юм.