Ил тод уул уурхай хэвлэлийн хурлын 5 дугаар сарын мэдээ

Ил тод уул уурхай хэвлэлийн хурлын 5 дугаар сарын мэдээ

“Coal & Metals Mongolia 2016” чуулга уулзалт боллоо
 
“Coal & Metals Mongolia 2016” олон улсын чуулга уулзалт энэ сарын 6-7-ны өдрүүдэд боллоо. Энэ чуулганд УУЯ, АМГ болон уул уурхайн салбарт хөрөнгө оруулагч дотоод, гадаадын 600 орчим зочид төлөөлөгчид оролцлоо.
 
Энэ жил нүүрсний салбарын “Coal Mongolia”, металлын салбарын “Metals Mongolia” болон уул уурхайн тоног төхөөрөмжийн  “MineTech” үзэсгэлэнг нэгтгэн, нэг дор зохион байгуулж байгаагаараа онцлог болсон.  Чуулганд Хятад, Казахстан, Австрали, Японы төлөөлөгчид түлхүү оролцсон байна.
 
Оюутолгой төслийн 2 дахь шатны бүтээн байгуулалтын ажил эхэллээ
 
Монголд төдийгүй дэлхийд томоохонд тооцогдох Оюутолгой төслийн 2 дахь шат буюу далд уурхайн бүтээн байгуулалтын ажлыг энэ сард эхлүүллээ.
 
Дэлхийн эдийн засаг, ялангуяа эрдэс баялгийн зах зээлийн хямралт байдал, төслийн зардлын хэтрэлт, татварын маргаан зэрэг хүчин зүйлсийн улмаас түр зуурын хүндрэл бэрхшээл, үл ойлголцол тулгарч байсан боловч олон улсын банк, санхүүгийн байгууллагуудын дэмжлэг, талуудын идэвхтэй хамтын ажиллагааны үр дүнд далд уурхайн бүтээн байгуулалтын ажлыг эхлүүлэх шийдвэрийг компанийн хувьцаа эзэмшигчид гаргалаа.
 
Оюутолгойн ордын нийт нөөцийн 80 гаруй хувийг далд уурхайгаас олборлох юм. Далд уурхайгаас 4-5 жилийн дараа олборлолт явуулж, 2027 оноос уурхай бүрэн хүчин чадлаараа ажиллаж, жилд 2 сая тн зэсийн баяжмал экспортод гаргана. Ил уурхайн хүдэр 0.3 хувийн зэсийн агуулгатай бол далд уурхайн хувьд 200 метрийн гүнээс доошхи хүдрийн зэсийн агуулга 0.6 болж нэмэгдэх юм. Оюутолгой төслийн хүрээнд нийт 3000 ажлын байр бий болох бөгөөд нийт ажиллагсдын 95 хувь нь монголчууд байх юм.
 
Уул уурхайн салбарын авлигын эрсдлийг бууруулах ажлын төлөвлгөөг батлав
 
Уул уурхайн салбарын үйл ажиллагаа, авлигын эрсдэлийг системтэй судалж байж авлигаас урьдчилан сэргийлэх үр нөлөөтэй арга хэмжээ авах боломжтой.
 
Энэхүү эрэлт хэрэгцээнд үндэслэн, НҮБХХ-ийн захиалгаар, тус байгууллагын боловсруулсан ‘Олборлох салбар дахь авлигын эрсдэлийг бууруулах’ олон улсын аргачлалыг ашиглан “Хараат бус судалгааны хүрээлэн” (IRIM)-ээс хайгуулын, ашиглалтын өмнөх, ашиглалтын, хаалтын үе шатууд дахь авлигын эрсдэлийг тодорхойлсон.
 
Энэ судалгааны үр дүнд Уул уурхайн сайдын  тушаалаар Авлигын эрсдлийг бууруулах үүрэг бүхий ажлын хэсгийг байгуулсан. Ажлын хэсгийн бүрэлдэхүүнд яам, харьяа агентлагууд болон Авлигатай тэмцэх газар, Уул уурхайн үндэсний ассоциаци, Монгол нүүрс ассоциаци, “ТАН эвсэл” ТББ-ын төлөөллийг орлцуулсан.
 
Ажлын хэсэг “Хараат бус судалгааны хүрээлэн” (IRIM)-ээс хайгуулын, ашиглалтын өмнөх, ашиглалтын, хаалтын үе шатууд дахь авлигын эрсдэлийг тодорхойлсон судалгааны дүнд суурилан Уул уурхайн салбарын авлигын эрсдлийг бууруулах ажлын төлөвлөгөөг боловсруулан хэрэгжүүлж эхлээд байна.
 
Төлөвлөгөөнд Эрх зүйн орчныг сайжруулах чиглэлээр 13 арга хэмжээ, мэдээлэл сургалт, сурталчилгааны чиглэлээр 3 арга хэмжээ, хүнд сурталыг арилгах, нээлттэй ил тод байдлыг хангах зохион байгуулалтын үйл ажиллагааны чиглэлээр 14 арга  хэмжээ тус тус төлөвлөсөн байна.
 
Хайгуулын 1173 тусгай зөвшөөрөл олгоод байна
 
Ашигт малтмалын газар нь Ашигт малтмалын тухай хуулийн  холбогдох заалтыг үндэслэн ашигт малтмалын тусгай зөвшөөрлийн 7 удаагийн сонгон шалгаруулалтыг амжилттай зохион байгууллаа.
 
Дээрх 7 удаагийн сонгон шалгаруулалтаар нийт 509 мянган га бүхий 63 талбай зарлагдаж, нийт 256 мянган га талбайд хайгуулын 21 тусгай зөвшөөрөл олгосон байна.
 
Энэ сарын 11-ний өдөр сонгон шалгаруулалтаар олгох нэр бүхий 8 талбайг зарласан. Тус сонгон шалгаруулалтад зарлагдсан талбайн дэлгэрэнгүй мэдээлэл Ашигт малтмалын газрын цахим хуудсанд нийтлэгдсэн.
 
Хайгуулын тусгай зөвшөөрөл хүссэн өргөдлийн дугаарыг цахим хэлбэрээр олгож эхэлснээс хойш  3915 дугаар олгосон. Үүнээс дугаар авсан 1580  аж ахуйн нэгж цагтаа ирж өргөдлөө гаргаагүй, дугаарын дагуу ирсэн 2335 өргөдлийг бүртгэн хянан шийдвэрлэсэн байна.
 
  • Тусгай зөвшөөрөл олгохоор шийдвэрлэсэн 1173
  • Тусгай зөвшөөрөл олгож болох эсэх талаар аймгийн Засаг даргаас санал авахаар хүлээж байгаа болон дэмжээгүй санал ирсэн шийдвэрлэгдээгүй нийт 457
  • Тусгай зөвшөөрөл олгохоос татгалзсан 669
  • Өмнөх өргөдөл нь шүүхийн маргаантай болон бусад шалтгаанаар хүлээгдэж байгаа 36 өргөдөл байна.
 
Уул уурхайн салбарын статистик мэдээлэл
 
2016 оны эхний 4 сарын байдлаар 7.4 сая тонн нүүрс, 2.7 тонн алт,  404.1 мянган тонн газрын тосыг тус тус олборлоод байна. 58.8 мянган тонн хайлуур жоншны баяжмал,  498.9 мянган тонн зэсийн хүдрийн баяжмал,  713.1 мянган тонн төмрийн хүдрийн баяжмал,  29.0 мянган тонн цайрын баяжмал тус тус үйлдвэрлэсэн байна.
 
Экспортын хувьд 2016 оны эхний 4 сард 557.5 мянган тонн зэсийн баяжмал,  1,386.8 мянган тонн төмрийн хүдэр,  4.3 тонн алт,  5.0 сая тонн нүүрс, 392.3 мянган тонн газрын тос тус тус экспортлосон байна.
 
Уул уурхайн сайдын багцын орлогын гүйцэтгэл
 
2016 оны эхний 4 сарын байдлаар  Ашигт малтмалын газар нийт 11.1 тэрбум төгрөг улсын төсөвт төвлөрүүлсэн бол Газрын тосны газар нийт 36.4 тэрбум төгрөг улсын төсөвт төвлөрүүлсэн байна.
 
Уул уурхайн сайдын багцын орлогоор 47.5 тэрбум төгрөг улсын төсөвт төвлөрсөн байна.
 
Гадаад хамтын ажиллагааны чиглэлээр хийгдсэн ажлууд
 
 Уул уурхайн сайд Р.Жигжид 2016 оны 5 дугаар сарын 2-ны өдөр Бүгд Найрамдах Энэтхэг Улсаас Монгол Улсад суугаа Онц бөгөөд Бүрэн эрхт Элчин сайд ноён Сомнат Гошийг хүлээн авч уулзав.
 
Уулзалтын үеэр коксжих нүүрсний салбарт Энэтхэгийн хөрөнгө оруулалтыг татах, тус улсад коксжих нүүрс нийлүүлэх боломжийг судлах болон цөмийн энерги, ураны салбарт хамтран ажиллах хоёр талын ажлын хэсгийн үйл ажиллагааг сэргээх талаар харилцан санал солилцов. Монгол Улсын Засгийн газар, Уул уурхайн яамны зүгээс хоёр улсын хамтын ажиллагааг өргөжүүлэн хөгжүүлэхэд бэлэн байгаагаа илэрхийлэж, уул уурхайн салбарт боловсон хүчин бэлтгэх, богино, дунд хугацааны сургалтад хамруулах, мэргэжилтэнг чадавхижуулах чиглэлээр хамтран ажиллахаар тохиролцов. Мөн Уул уурхайн сайд ОУАЭА-ийн Ерөнхий захирлын орлогч бөгөөд Техникийн хамтын ажиллагааны газрын дарга ноён Дажу Яныг хүлээн авч уулзав. Уулзалтын үеэр сайд Р.Жигжид салбарын өнөөгийн байдал, хууль эрх зүйн орчны талаар танилцуулав. Ноён Дажу Ян цөмийн энергийн салбарт хамтран ажиллах өргөн боломжтой болохыг тэмдэглэв.
 
Уул уурхайн яамны Төрийн нарийн бичгийн дарга Д.Артаг Бүгд Найрамдах Солонгос Улсад 2016 оны 5 дугаар сарын 5-ны өдөр ажиллав. Энэ үеэр Бүгд Найрамдах Колумби Улсаас Бүгд Найрамдах Солонгос Улсад Монгол Улсыг хавсран суугаа Онц бөгөөд бүрэн эрхт элчин сайд ноён Тито Саул Пиниллатай уулзав.
 
Уулзалтын үеэр геологи, уул уурхайн салбарын хамтын ажиллагаа, хөрөнгө оруулалт болон татварын зохицуулалт, бодлого, SENA буюу Колумбийн Үндэсний сургалтын төвд уул уурхайн салбарын мэргэжилтэн бэлтгэх, бичил уурхайн зохицуулалт, зохион байгуулалт, албажуулалт, ашигт малтмалын нөөцийн ангилалын тогтолцоо, уурхайн үйл ажиллагааны болон хаалтын технологи зэрэг чиглэлээр хамтран ажиллах тухай тусгасан санамж бичгийн төслийг колумбийн талд гардуулав.
 
Ердийн хэрэглээний 40 хоногийн нөөцтэй байна
 
2016 оны 5 дугаар сарын 25-ны өдрийн байдлаар улсын хэмжээнд дунджаар ердийн хэрэглээний 40 хоногийн газрын тосны бүтээгдэхүүний нөөцтэй байгаа бөгөөд үүнээс А-80 автобензин 44, Аи-92 автобензин 59, дизелийн түлш 52, ТС-1 20 хоногийн нөөцтэй байна.