ГЕОЛОГИ, УУЛ УУРХАЙН САЛБАРЫНХАН ТӨРИЙН ОДОНГООР ЭНГЭРЭЭ МЯЛААЛАА
Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадам, мөн Монгол Улсад орчин цагийн Уул уурхайн салбар үүсэж хөгжсөний түүхт 100 жилийн ойг тохиолдуулан Уул уурхай, хүнд үйлдвэрийн сайд Г.Ёндон салбартаа манлайлж, салбарын хөгжилд хөдөлмөр, бүтээлээ зориулан үнэтэй хувь нэмэр оруулсан ахмадууд, ажилтнуудад төрийн дээд одон гардууллаа.
Сайд Г.Ёндон шагнал гардуулах ёслолыг нээж, “Одоогоос 100 жилийн өмнө Налайхын нүүрсний уурхайг төрийн мэдэлд авснаар хөгжлийн суурь тавигдаж байсан салбар маань өнөөдөр Монгол Улсын эдийн засгийн тулгуур салбар болтлоо хөгжсөн байна. Өнөөдөр уул уурхайн салбар дотоодын нийт бүтээгдэхүүний 24 хувь, аж үйлдвэрийн нийт бүтээгэхүүний 67 хувь, гадаадын шууд хөрөнгө оруулалтын 76 хувь, экспортын орлогын 93 хувь, улсын төсвийн орлогын 30 орчим хувийг дангаараа бүрдүүлж байгаа нь уурхайчдын нөр их хөдөлмөрийн үр шим юм. Уурхайчид маань улс орны хөгжлийн төлөө зогсох эрхгүйгээр ажиллаж, уул уурхайн салбарыг хөгжлийн өнөөгийн түвшинд хүргэхэд ахмадууд, эрдэмтэн судлаачид, салбарын үе үеийн удирдлага, хамт олон чухал үүрэг гүйцэтгэснийг тэмдэглэн хэлэхэд таатай байна” гэв.
Мөн тэрээр, Шинжлэх ухаан, технологийн их сургуулийн Геологи, уул уурхайн сургуулийн тэргүүлэх эрдэмтэд, профессоруудын туурвисан “Уул уурхайн технологи, эдийн засаг, экологи” эрдэм судлалын цогц долоон боть бүтээлд Монгол Улсын Төрийн шагнал олголоо. Төрийн шагнал хүртсэн Академич П.Очирбат, доктор, профессор Л.Пүрэв, С.Цэдэндорж, Ж.Цэвэгмид нартаа халуун баяр хүргэж эрдэм шинжилгээ, бүтээл туурвилынх нь ажилд амжилт хүслээ.
Геологи, уул уурхайн салбарын хөгжлийн төлөө 37 жилийн хөдөлмөрөө зориулахдаа салбарын бодлого, хөгжлийн үндсэн чиглэлийг тодорхойлоход үр бүтээлтэй ажиллаж, уул уурхайн стратегийн ордуудыг эдийн засгийн эргэлтэд оруулах, үр ашгийг нэмэгдүүлэхэд бодит үр дүн гарган Монгол-Оросын хамтарсан “Монголросцветмет” нэгдэл, уулын баяжуулах “Эрдэнэт” үйлдвэр зэрэг уул уурхайн салбарын анхны том үйлдвэр, уурхайнуудыг барьж байгуулах, салбарын үндэсний боловсон хүчнийг сургаж бэлтгэх, Монгол Улсын Засгийн газрын бодлого, зорилтуудыг амжилттай хэрэгжүүлэхэд оруулсан бодит хувь нэмэр, КОВИД-19 цар тахлын нийгэм эдийн засаг, ард иргэдийн аж амьдралд үзүүлэх сөрөг нөлөөг бууруулах, ахуйн хог хаягдал, ус, цахилгаан, дулааны төлбөрөөс чөлөөлөх бодлогыг үр дүнтэй хэрэгжүүлэхэд манлайлан ажиллаж, уулын баяжуулах “Эрдэнэт” үйлдвэрийг удирдан зохион байгуулж байгаа хөдөлмөр зүтгэл, Монгол Улсын эдийн засаг, аж үйлдвэрлэлийн салбарын хөгжил, дэвшилд оруулсан бодит хувь нэмрийг нь өндрөөр үнэлэн, Улсын Их Хурлын гишүүн, Уул уурхай, хүнд үйлдвэрийн Дэд сайд асан, “Улсын баатар Эрдэнэт үйлдвэр”-ийн Ерөнхий захирал, Аж үйлдвэрийн гавьяат ажилтан Хоохорын Бадамсүрэнд Монгол Улсын Хөдөлмөрийн баатар цол хүртээсэнд баяр хүргэж, ажлын амжилт хүсэв.
Харин өнөөдөр, Сүхбаатарын одонгоор Бэрхийн уурхайн ерөнхий инженерийн орлогчоос ажлын гараагаа эхэлж салбарын яам, Улсын төлөвлөгөөний комисс, Монгол Эрдэнэ компани, Монголросцветмет нэгдэл, Монголчехметалл компанид хариуцлагатай ажил гүйцэтгэж улмаар манай салбарын яамны дэд сайдаар олон жил үр бүтээлтэй ажилласан Дамдингийн Амгалан;
Аж үйлдвэрийн гавъяат ажилтан цолоор Аж үйлдвэрийн яаманд санхүүгийн мэргэжилтнээр ажлын гараагаа эхэлж улмаар ЗХУ-д дээд сургууль төгсөж ирээд Түлш, эрчим хүч, геологи, уул уурхайн яаманд Төлөвлөгөө, эдийн засгийн хэлтсийн дарга, Геологи, уул уурхайн үйлдвэрийн яамны нэгдүгээр орлогч сайд, Монголчехметалл, Монголросцветмет нэгдэл, Эрэл ХХК, Эрэл банкинд газрын захирал, Ерөнхий ня-бо, гүйцэтгэх захирлаар ажиллаж байсан Гомбожавын Дорж, Монгол Улсад тэсэлгээний салбар бий болох үндсийг тавьж өнөөг хүртэл хөгжүүлсээр байгаа, төрийн шагналт Жижигийн Жамъян, Эрдэнэт уулын баяжуулах үйлдвэрээс ажлын гараагаа эхэлж төрийн яам, хувийн хэвшил, төрийн бус байгууллага, олон улсын байгууллагад олон жил идэвх зүтгэлтэй ажиллаж байгаа “Ассоциацын” хэмээх Намгарын Алагаа, Геологийн төв лабораторийн ерөнхий инженерээр ажлын гараагаа эхэлж, салбартаа 30 гаруй жил ажиллаж байгаа ба одоогоор Монголын геологийн холбоодын нэгдсэн зөвлөлийн нарийн бичгийн даргын үүрэгт ажлыг гүйцэтгэж байгаа Галданжамцын Бат-Эрдэнэ нар энгэрээ мялаалаа.
Мөн Гавъяат уурхайчин цолоор Шарын голын уурхайд засварчнаар ажлын гараагаа эхэлж уурхайн ерөнхий инженер, Түлш эрчим хүчний яам, Эрчим хүч, геологи, уул уурхайн яамны дэд сайд, газрын дарга, Нүүрсний газрын дарга, Түлш, эрчим хүний ерөнхий газрын дэд даргаар ажиллаж байсан манай ахмад уурхайчин Загарын Төмөрбаатар гуай, Баянтээгийн уурхайн даргаар ажиллаж байсан, БНМАУ-ын Ардын Их Хурлын депутат Самбуугийн Пүрэвдорж, Шивээ-Овоогийн уурхайд тасралтгүй 30 жил хүнд даацын технологийн автомашины оператороор ажиллаж байгаа Борхүүгийн Цогтсайхан, хоосон тал дээр цахилгаан станц, ил уурхай, баяжуулах үйлдвэр, орон сууцны цогцолборыг сүндэрлүүлсэн “Энержи Ресурс” ХХК-ийн гүйцэтгэх захирал Готовын Батцэнгэл нар шагнуулж, хөдөлмөрөө үнэлүүллээ.
Уул уурхай, хүнд үйлдвэрийн сайд Г.Ёндон, “Салбарын маань 100 жилийн ой энэ оны 12-р сарын 25-нд тохионо. Түүхт ойн өдрийг хүртэл салбарын маань олон олон сайчууд ажил хөдөлмөрөө үнэлүүлж, төрийн одон, гавъяат гэсэн эрхэм цолоор шагнуулна гэдэгт итгэлтэй байгаагаа илэрхийлээд эрхэм уурхайчид болон тэдний ар гэр, хамт олонд Улсын баяр наадмын мэндийг хүргэж, аз жаргал, амжилт бүтээл, эрүүл энхийг хүсэн ерөөв.
