“Уул уурхай-2016” онол практикийн бага хурал боллоо

Монгол Улсад уул уурхайн салбар үүсч хөгжсний 94 жилийн ой энэ өдрүүдэд тохиож байна. Тодруулбал, Ардын Засгийн газрын шийдвэрээр 1922 оны 12 дугаар сарын 25-ны өдрөөс Налайхын нүүрсний газрын ашиглалтыг улсын мэдэлд авсан цагаас манай улсад энэ салбар орчин үеийн агуулгаар хөгжсөн гэж үздэг.

Баярыг угтан Уул уурхайн мэргэжлийн холбоодын зөвлөл ТББ, Уул уурхай, хүнд үйлдвэрийн яам хамтран “Уул уурхай-2016” онол, практикийн бага хурлыг ШУТИС дээр зохион байгууллаа.

Бага хуралд УУХҮЯ-ны Бодлогын хэрэгжилтийг зохицуулах газрын дарга Д.Даваадорж, Уул уурхайн мэргэжлийн холбоодын зөвлөлийн ерөнхийлөгч Д.Цогбаатар болон Монгол Улсын зөвлөх инженерүүд, эрдэмтэн докторууд оролцож, илтгэл тавилаа.

Эрдэмтэд 10 гаруй илтгэл хэлэлцүүлснээс судлаач З.Төмөрбаатарын “Улаанбаатар хотын агаарын бохирдлыг бууруулахад Налайхын нүүрсний уурхайн байгалийн хийг ашиглах боломж”, Б.Мягмаржавын Алтны үндсэн ордын хүдэр ба баяжмалыг боловсруулах гидрометаллургийн технологи”, Б.Улаанбаатарын “Монголын уул уурхайн хууль эрхзүйн орчинд хийсэн зарим дүгнэлт” зэрэг илтгэлүүд онцгой анхаарал татаж байлаа. Энэ маягаар эрдэмтэд маань Оюутолгой, Тавантолгой, Гацуурт, Алт-2 хөтөлбөр зэрэг томоохон төслүүдэд өөрсдийн саналаа тусгаж, судалгааны өгөөжөө шингээх замаар улсынхаа эдийн засгийг сэргээхэд хувь нэмрээ оруулж байгааг зохион байгуулагчид нь онцолж байв.

Хурлын үеэр зарим хүнийг Салбарын тэргүүний ажилтан цол, тэмдэгээр шагнасан байна.