ХАЙГУУЛЫН ЧИГЛЭЛД ХӨРӨНГӨ ОРУУЛАХ СОНИРХОЛТОЙ АВСТРАЛИЙН БИЗНЕС ЭРХЛЭГЧДИЙГ ХҮЛЭЭН АВЧ УУЛЗАВ

Австрали улсын уул уурхайн салбарын хамгийн том, нөлөө бүхий IMARC “Олон улсын уул уурхай ба эрдэс баялгийн бага хурал, үзэсгэлэн” тус улсын Сидней хотод энэ сарын 2-4-ний өдрүүдэд зохион байгуулагдана. Энэхүү хурал, үзэсгэлэнд дэлхийн уул уурхайн салбарын тэргүүлэгчид, шилдэг удирдагчид харилцан яриа өрнүүлж, салбарын хамтын ажиллагааг дараагийн түвшинд тодорхойлохын зэрэгцээ салбарын хөрөнгө оруулалт, шинэ технологи, санхүү, ирээдүйн нэгдмэл сүлжээг бий болгодог ач холбогдолтой арга хэмжээ юм.

Хурал, үзэсгэлэнгийн өмнөх өдөр Уул уурхай, хүнд үйлдвэрийн сайд Ж.Ганбаатар тэргүүтэй төлөөлөл манай улсын уул уурхайн салбарт, тэр дундаа ашигт малтмалын хайгуулын чиглэлд хөрөнгө оруулах сонирхлоо илэрхийлсэн тус улсын уул уурхайн компаниудын төлөөлөл болон хөрөнгө оруулагчидтай уулзлаа. 

Уулзалтаар Монгол Улсын ашигт малтмалын нөөц, хэтийн төлөв, хөрөнгө оруулалтын боломж-давуу тал, мөн тулгарч буй хүндрэл бэрхшээл, түүнийг даван туулах арга замууд, хэрэгжүүлж буй арга хэмжээнүүдийн талаар нээлттэй танилцуулсан.

Уулзалтын төгсгөлд хөрөнгө оруулагчид Монгол Улс геологийн өвөрмөц тогтоцтой, ашигт малтмалын хэтийн төлөв өндөртэй, сонирхол татахуйц гэдэгтэй санал нэгдэж, уул уурхай, түүнийг даган бий болдог бүтээн байгуулалтаас үр шим хүртэх гинжин хэлхээг тасралтгүй үргэжлүүлэхийн тулд хөрөнгө оруулагчдын сонирхсон талбайд хайгуул хийлгэх боломжийг олгох, зөвхөн металлын төслүүдээс гадна нүүрсэнд агуулагдаж буй метан хийн хэтийн төлөв, хөрөнгө оруулалтын дараах улс төрийн тогтворгүй байдлын эрсдэлд анхаарал хандуулахыг хүслээ.