БАГАНУУР ХК-ИЙН МАШИНИСТ Г.ОТГОНПҮРЭВ ТӨРИЙН ДЭЭД ОДОН ХӨДӨЛМӨРИЙН БААТАР ЦОЛООР ШАГНУУЛЛАА
Монгол Улсын Ерөнхийлөгчийн зарлигаар Багануур хувьцаат компанийн экскаваторын машинист Г.Отгонпүрэвийг Хөдөлмөрийн Баатар цолоор шагналаа.
Төрийн дээд одон гардуулах ёслолын ажиллагаанд УИХ-ын гишүүн, Уул уурхай, хүнд үйлдвэрийн сайд Ж.Ганбаатар оролцож, салбарын отгон Хөдөлмөрийн баатарт баяр хүргэв.
Г.Отгонпүрэв нь сурагчийн ширээнээс ажилчин болж, Зөвлөлтийн Мэдьмолибденстрой барилгын байгуулагын харьяа СУ-1-д мэргэжилтэн И.В Алёшинко ахлагчтай Өрлөгийн интернациональ бригадын гишүүн болж Багануурыг бүтээн байгуулах ажилд гар бие оролцож явсан ба улмаар мэргэжил мэдлэгээ дээшлүүлэх зорилгоор ЗХУ-ын Украйн улсын Александрия хотод экскаваторын цахилгаан тоног төхөөрөмжийн засварчны курст 1982 онд суралцан мэргэжил эзэмшсэн. 1983 онд цэргийн албанд тэнцэн Эрдэнэт хот дахь цэргийн армид алба хаасан байна.
1986 онд цэргээс халагдаж ирээд Багануурын уурхайн Уулын 1-р хэсгийн В.Хашхүү ахлагчтай ЭШ15/90 алхагч экскаваторын 2-р туслах машинчаар ажил хөдөлмөрийн гараагаа эхэлсэн. Зөвлөлтийн мэргэжилтэн В.И.Лысов, А.И Жуков монгол машинч Д.Ганболд, Д.Ганбат, Б.Баатар нараар тус экскаваторын тосолгоо, үйлчилгээг хэрхэн хийх, механик болон цахилгаан экскаваторыг яаж удирдан ажиллахыг заалгаж ажилласан. Эдгээр багш нарыхаа мэддэг чаддаг бүхнийг сурч эзэмшин 1990 онд 1-р туслах машинч, 1993 онд машинч болон дэвшиж одоог хүртэл ЭШ 15/90 №137 экскаваторын машинчаар ажиллаж байна.
Г.Отгонпүрэв нь ЭШ 15/90 №137 экскаваторын алхахын түгээх насосны шингэн алдалтыг багасгах шинэ бүтээл оновчтой санаачилга гарган ажилдаа нэвтрүүлснээр эдийн засгийн хэмнэлт гарч, одоо ч ашиглагдсаар байна. Мөн Экскаваторын өргөх, татах, алхахын өтгөн тосолгоотой гар ажиллагаатай механизмыг цахилгаан шахуургаар тосолдог болгосон нь шилдэг санаачилга болж шилжин явах цомоор шагнуулж байв.
Мөн экскаватороор хатуулаг ихтэй ажлын портонд ажиллах нүүрсний тааз цэвэрлэх, авто зам спуск засах, кунтровка гаргах, авто ачилт хийх зэрэг ур чадвар шаардсан ажил үүргийг амжилтай шийдвэрлэж ажилдаа хэрэгжүүлж чадсан. ХАБЭА-н хууль дүрэм журмыг ягштал биелүүлж, өдөр тутмын ажлын техникийн үзлэгийг тогтмол чанартай хийж үйл ажиллагаандаа хэвшил болгож чадсанаар техник технологийн аваар ослоос урьдчилан сэргийлж чаддаг.
Г.Отгонпүрэв нь 2019 онд экскаваторын сумны үндсэн хатуу холбоос тасарч байсныг ээлжит бус үзлэгээр илрүүлж шуурхай арга хэмжээ авч гарч болзошгүй ноцтой аюул ослоос урьдчилан сэргийлж чадсан. Мөн экскаваторын их биений дагуух хананы цууралтыг зогсоох аргачлал гаргаж шийдвэрлэсэн зэрэг олон санал төслүүд дээр идэвх чармайлттай ажиллаж байна. Үүний үр дүнд үйлдвэрлэлийн төлөвлөгөөт даалгаврыг жил, сар бүр 100-135 хувиар биелүүлэн ажиллаж байна.
Бүгд Найрамдах Улс тунхагласны 98 жилийн ой, Их эзэн Чингис хааны мэндэлсний 860 жилийн ой, Монгол бахархлын өдрийг тохиолдуулан мөн Монгол Улсад орчин цагийн уул уурхайн салбар үүсэж хөгжсөний 100 жилийн ойн хүрээнд уул уурхайн салбарын хөгжил дэвшилд оруулсан хувь нэмэр, хичээл зүтгэлийг нь үнэлэн түүнд энэхүү Төрийн дээд одонг гардуулжээ.
