ӨМНӨГОВЬ АЙМГИЙН ИРГЭДЭД УУЛ УУРХАЙН ӨГӨГДӨЛ, МЭДЭЭЛЛИЙН ХҮРТЭЭМЖИЙГ НЭМЭГДҮҮЛЭХ, ӨГӨГДӨЛД ТҮШИГЛЭСЭН ХЭЛЭЛЦҮҮЛГИЙГ ДЭМЖИХ 28 СУРГАГЧ БАГШ БЭЛТГЭГДЛЭЭ
Дэлхийн банк группын гишүүнОлон улсын санхүүгийн корпорацийн Хөгжлийн төлөөх ил тод байдал хөтөлбөр, Уул уурхай, хүнд үйлдвэрийн яам, Өмнөговь аймгийн Засаг даргын тамгын газартай хамтран 12 дугаар сарын 6,7-ны өдрүүдэд Өмнөговь аймгийн Даланзадгад хотноо “Уул уурхайн өгөгдөл, мэдээлэлтэй ажиллах нь” сэдэвт сургагч багш бэлтгэх сургалтыг амжилттай зохион байгууллаа.
Оролцогчид хоёр өдрийн турш уул уурхайн салбарын онцлог, орлогын менежмент, эдийн засаг, нийгэм, байгаль орчин, засаглалтай холбоотой нээлттэй өгөгдөл, мэдээллийн эх сурвалжууд, тэдгээрийг дүгнэн шинжлэх, орон нутгийн иргэдэд ойлгомжтойгоор дүрсжүүлэн хүргэх, насанд хүрэгчдэд багшлах ур чадвар, өгөгдөлтэй ажиллах ёс зүй зэрэг өргөн агуулгын хүрээнд онол, практик хослуулан суралцлаа.
Сургалтанд Өмнөговь аймагт үйл ажиллагаа явуулдаг Оюу толгой, Энержи ресурс, Хүрэн толгой коал майнинг, Платиниум ланд, Гашуун сухайт авто зам, Терра энержи зэрэг компанийн төлөөллүүд, нутгийн захиргааны байгууллагын албан хаагчид, Мөнх ногоон галба ТББ, Хөгжлийн шийдэл ТББ, Тогтвортой хөгжил нийгмийн хариуцлагын зөвлөл ТББ зэрэг байгууллагуудын төлөөлөл, аймгийн залуучуудын төлөөлөл оролцлоо. Түүнчлэн Улаанбаатар хотоос Tovch.mn, Business.mn сайтын редакторууд, УУХҮЯ-ны хэвлэлийн ажилтан, Монголын гидрогеологичдын холбооны төлөөлөл оролцсон.
Сургалтын төгсгөлд, оролцогчид сургалтаас олж авсан мэдлэгээ ашиглан өөрсдийн сонгосон сэдвийн хүрээнд өгөгдөл, мэдээлэл цуглуулан түүнийгээ дүгнэн шинжилж, иргэд, олон нийтэд хялбар, ойлгомжтой байдлаар мэдээлэл хүргэх дүрсжүүлэлтийн арга ашиглан өгөгдөл, мэдээллээ дүрсжүүлж, сурсан мэдсэнээ тайлагнан шалгалт өгч сургагч багшийн сертификатаа гардан авсан юм.
Цаашид тус хөтөлбөр нь олон талт оролцогчдыг хамарсан сургагч багш нарын хамт 6 сарын турш өгөгдөлд түшиглэсэн хэлэлцүүлгийг Өмнөговь аймагт өрнүүлэх, зорилтот бүлэгт чиглэсэн өгөгдөл ашиглах сургалтыг зохион байгуулахад дэмжлэг үзүүлэн ажиллах юм.
“Хөгжлийн төлөөх ил тод байдал” олон улсын хөтөлбөр нь BHP Сан-тай хамтран ил тод байдал, нээлттэй өгөгдлийн хэрэглээг нэмэгдүүлэх чиглэлээр Монгол Улсад 2019 оноос хэрэгжиж байна. Одоогийн байдлаар, өгөгдөл ашиглах чадавхийг бэхжүүлэх 20 гаруй арга хэмжээ, өгөгдлийн тэмцээн зэргээр дамжуулан төр, хувийн хэвшлийн 500 гаруй өгөгдөл хэрэглэгч (үүнд иргэний нийгмийн болон хэвлэл мэдээллийн байгууллагууд, уул уурхайн компаниуд, судалгаа шинжилгээний байгуулагууд, их дээд сургуулиуд, залуусын төлөөлөл зэрэг багтаж байна)-д хүрч ажилласан байна.