ГЕОЛОГИ, УУЛ УУРХАЙ, ХҮНД ҮЙЛДВЭРИЙН САЛБАРЫН 2023-2024 ОНЫ ХАМТЫН ХЭЛЭЛЦЭЭР

Уул уурхай, хүнд үйлдвэрийн яам нь Хөдөлмөр, нийгмийн хамгааллын яам, Монголын эрчим хүч, геологи, уул уурхайн үйлдвэрчний эвлэлийн холбоотой хамтран жил бүр “Геологи, уул уурхай, хүнд үйлдвэрийн салбарын хамтын хэлэлцээр”-ийг баталж, дагаж мөрдөхийг аж ахуйн нэгжүүдэд үүрэг болгодог.
Салбарын яамны зүгээс салбарт ажиллагсдын цалин хөлсийг ажлын байрны онцлог, хөдөлмөрийн нөхцөл зэрэгтэй уялдуулан бусад салбартай өрсөлдөхүйц, өндөр тогтоох чиглэл баримтлан хамтын хэлэлцээрт оролцдог.
Ижил төрлийн ажил үйлчилгээг гүйцэтгэж буй албан хаагчдын хөдөлмөрийн үнэлэмж ижил байх ёстой хэдий ч салбарт үйл ажиллагаа явуулж буй аж ахуйн нэгжүүдийн үндсэн болон туслан гүйцэтгэгчдийн цалингийн хэмжээ зөрүүтэй байсаар байна. Салбарын яамны зүгээс цаашид энэ ялгааг арилгах зорилт тавин ажиллаж байна.

Оюу Толгой ХХК нь УУХҮЯ-нд “Ажилтны дундаж цалин хөлсний бүрэлдэхүүнд өөрчлөлт оруулж байгаа тухай” мэдээллийг 2024-02-07-нд 01/318 тоот албан бичгээр ирүүлсэн. Үүсээд буй нөхцөл байдлыг холбогдох хууль тогтоомж, ажил олгогч болон үйлдвэрчний эвлэл хооронд байгуулсан хамтын гэрээний дагуу хэлэцээ хийх замаар шийдвэрлэх нь зүйтэй байна.