Аж үйлдвэр, Эрдэс баялгийн сайд Ц.Туваан Геологийн судалгаа-шинжилгээний төв ТӨҮГ-ын үйл ажиллагаатай танилцлаа

Уулзалтад Аж үйлдвэр, Эрдэс баялгийн сайд Ц.Туваан, Сайдын зөвлөх Ш.Ганхуяг, Геологийн судалгаа-шинжилгээний төв ТӨҮГ-ын дарга Д.Мөнхбаатар, холбогдох газар, хэлтсийн дарга нар оролцож геологийн судалгаа, шинжилгээний үйл явц, бодлого төлөвлөлт, тус салбарт тулгамдаж асуудлуудын талаар санал солилцов.

Геологийн хайгуулын хайгуулын ажлын хээрийн судалгааны үед сорьцолсон төрөл бүрийн дээж болон ашигт малтмалын олборлолт боловсруулалтын үеийн бүх шатны дээжний лабораторийн шинжилгээ, уул уурхайн бүтээгдэхүүний экспортын хяналт, гаалийн хяналтын шинжилгээ, стандартчилсан загварын үйлдвэрлэл, ур чадварын сорилт, зохион байгуулах ажлыг гүйцэтгэдэг ба олон улсын стандартуудыг үйл ажиллагаандаа нэвтрүүлэн ажиллаж байгаа талаараа танилцууллаа.

Түүнчлэн тус салбарынхан үндэсний аюулгүй байдлын хэмжээний мэдээллийг бэлтгэдэг учир онцгой хариуцлагатай, нарийн мэргэшсэн ур чадварыг шаарддаг гэдгийг салбарын мэргэжилтнүүдийн зүгээс онцлов.

Аж үйлдвэр, Эрдэс баялгийн сайд Ц.Туваан энэ удаагийн Засгийн газар маш том зорилтуудыг тавьж байгаа бөгөөд улс төржихгүй, ямар нэгэн гацаагүйгээр ажлаа урагшлуулж ажиллах зорилттой гэдгийг уулзалтын үеэр тэмдэглэв. Мөн Үндэсний баялгийн сангийн хуулийн төсөл батлагдсантай холбоотойгоор хуримтлалын сан бий болсон. Иймд Аж үйлдвэр, Эрдэс баялгийн салбар хамгийн чухал үүргийг гүйцэтгэнэ гэдгийг дурдав.

Төгсгөлд нь, Салбарын онцлогууд, хууль эрх зүй, зохион байгуулалт, бүтэцтэй холбоотой асуудлуудыг нэн яаралтай анхаарч бодлогын түвшинд Засгийн газарт уламжлан ажиллахаа сайдын зүгээс илэрхийлэв.

#Аж_үйлдвэр_Эрдэс_баялгийн_яам