![Аж үйлдвэр, Эрдэс баялгийн сайд Ц.Туваан Бүгд найрамдах Ардчилсан Лаос улсын дэд ерөнхийлөгч Пани Ятодүг хүлээн авч уулзлаа](https://mmhi.gov.mn/wp-content/uploads/2024/08/IMG_7533-scaled.jpg)
Аж үйлдвэр, Эрдэс баялгийн сайд Ц.Туваан Бүгд найрамдах Ардчилсан Лаос улсын дэд ерөнхийлөгч Пани Ятодүг хүлээн авч уулзлаа
Аж үйлдвэр, Эрдэс баялгийн сайд Ц.Туваан уулзалтын эхэнд Манай хоёр улс өнө эртний түүхэн холбоотой, оюун санаа, өв соёлын түүхэн уламжлалтайг онцлоод, Монгол Улсын Их хурлын ээлжит сонгуулийн үр дүнд шинээр байгуулагдсан хамтарсан Засгийн газрын зүгээс аж үйлдвэрийн салбараа түлхүү хөгжүүлэх бодлого баримталж буйг илэрхийлэв.
Уул уурхайн салбарыг аж үйлдвэрийн салбартай уялдуулан хөгжүүлэх, нэмүү өртөг шингээсэн бүтээгдэхүүн үйлдвэрлэл болон эрдэс баялгийн боловсруулалтад тэргүүлэх ач холбогдол өгч байгаагаа тэмдэглэв.
Түүнчлэн манай орны хувьд байгалийн нөөц баялаг арвин, энэхүү баялгийг ашиглан аж үйлдвэрээ хөгжүүлэх, байгалийн баялгаас олсон үр өгөөжийг улс орны эдийн засгийн хөгжилд чухал ач холбогдолтой томоохон төслүүдийг хөгжүүлэх, эрчимжүүлэхээр ажиллана гэдгээ тэмдэглээд, Үндэсний баялгийн сангийн тухай хууль батлагдсантай холбогдуулан баялгийн хуримтлалыг бий болгож, иргэддээ орон сууцны зээл, боловсрол, эрүүл мэндийн үйлчилгээнд хөнгөлөлт авахад зарцуулахыг зорин ажиллаж буйгаа онцлов.
![](https://mmhi.gov.mn/wp-content/uploads/2024/08/IMG_7534-scaled.jpg)
![](https://mmhi.gov.mn/wp-content/uploads/2024/08/IMG_7540-scaled.jpg)
![](https://mmhi.gov.mn/wp-content/uploads/2024/08/IMG_7544-scaled.jpg)
Бүгд найрамдах Лаос улсын дэд ерөнхийлөгч Пани Ятодү уулзалтын эхэнд бидний төлөөлөгчдийг хүлээн авч байгаа эрхмэсэг сайд болон бусад албан тушаалтнуудад талархал илэрхийлж, манай хоёр орны харилцаа хамтын ажиллагаа олон зууны түүхтэйг онцлоод, хоёр орны харилцаа, хамтын ажиллагаа, бүхий л шатанд өргөжин хөгжиж байгаад туйлаас баяртай байгаагаа илэрхийлэв.
Дэлхийн эмэгтэйчүүдийн чуулга уулзалтад оролцох хүрээндээ аж үйлдвэр, уул уурхайн салбарт Монгол Улсын Засгийн газрын баримталж буй бодлогыг судлах хүсэлтэй байгаагаа илэрхийлж, манай хоёр орон байгалийн баялаг ихтэй, далайд гарцгүй тул туршлага хуримтлуулах сонирхолтой байгаа хэмээв. Мөн гаднын хөрөнгө оруулалтыг уул уурхайн салбарт оруулсан туршлага, яамны зүгээс баримталж буй бодлого, нөхөн сэргээлтийн арга хэмжээ, хууль эрх зүйн орчны талаар туршлага судлах сонирхолтой байна хэмээн Аж үйлдвэр, Эрдэс баялгийн яамны газар, хэлтсийн дарга нар Бүгд найрамдах Ардчилсан Лаос улсын дэд ерөнхийлөгчийн айлчлалын баг бүрэлдэхүүнд мэдээлэл өглөө.
Төгсгөлд нь Лаосын дэд ерөнхийлөгч Пани Ятодү Лаос улсын хувьд уул уурхайн салбарт түшиглэсэн эдийн засгийн бодлого баримталж буй бөгөөд байгалийн нөхөн сэргээлтийг хэрхэн шийдвэрлэх гэх мэтчилэн томоохон асуудлууд тулгардаг учир туршлага солилцохоор Монгол Улсын Аж үйлдвэр, Эрдэс баялгийн яам болон Лаосын Аж үйлдвэрийн яамны хамтарсан уулзалтуудыг зохион байгуулж харилцан хамтын ажиллагаагаа улам өргөжүүлэн хөгжүүлэх хүсэлтэй байгаа тул Лаос улсад энэхүү асуудлаар дахин уулзах ерөөл дэвшүүлье хэмээв.
Аж үйлдвэр, Эрдэс баялгийн сайд Ц.Туваан урилгыг мөн хүлээн авч, танай сайхан оронд өнгөрсөн жил Монгол Улсын ерөнхийлөгчтэй хамт айлчлаад ирсэн хэмээн сэтгэгдэл маш өндөр буйгаа илэрхийлэв.
![](https://mmhi.gov.mn/wp-content/uploads/2024/08/IMG_7549-1-scaled.jpg)
![](https://mmhi.gov.mn/wp-content/uploads/2024/08/IMG_7554-scaled.jpg)