ЭРДЭНЭТ ҮЙЛДВЭРИЙН ХҮДЭР БОЛОВСРУУЛАХ ХҮЧИН ЧАДАЛ 40 САЯ ТОННД ХҮРЭВ
“Эрдэнэт үйлдвэр”-ийн хамт олон байгалийн баялгийн үр өгөөжийг Баялгийн сангаар дамжуулан нийт ард түмэндээ хүртээх төр, засгийн бодлого, шийдвэрийг хэрэгжүүлж, нийгэм, эдийн засагт оруулж буй хувь нэмрээ нэмэгдүүлэх зорилтын хүрээнд Уулын баяжуулах үйлдвэрийн Өөрөө нунтаглах хэсгийн хүчин чадлыг жилд 6 сая тн-оор нэмэгдүүлэх шинэ 4 дүгээр шугамын өргөтгөлийг ашиглалтад орууллаа.
Нээлтийн ажиллагаанд Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар, Монголын Уул уурхайн үндэсний ассоциацын гүйцэтгэх захирал Г.Эрдэнэтуяа болон АҮЭБЯ-ны төлөөлөгчид, Эрдэнэт үйлдвэрийн Ерөнхий захирал Г.Ёндон, үйлдвэрийн удирдлагууд, Баяжуулах үйлдвэрийн уурхайчдын төлөөлөл оролцлоо.
Засгийн газрын 2020-2024 оны үйл ажиллагааны хөтөлбөр, “Эрдэнэт үйлдвэр” ТӨҮГ-ыг 2031 он хүртэл хугацаанд хөгжүүлэх үндсэн чиглэлд Баяжуулах үйлдвэрийн хүчин чадлыг нэмэгдүүлэн 40 сая тоннд хүрэх зорилт дэвшүүлсэн юм.
Үүний тулд эхний ээлжинд Баяжуулах үйлдвэрийн Өөрөө нунтаглах хэсгийн хүчин чадлыг 6 сая тн-оор нэмэгдүүлэн, шинэ 4 дүгээр шугамын өргөтгөлийн ажлыг 2020 оны 04 дүгээр сараас 2022 оны 08 дугаар сард гүйцэтгэсэн. Тус өргөтгөлийг ашиглалтад оруулснаас хойших 1 жилийн хугацаанд 6 сая тн хүдэр боловсруулж, төслийн хүчин чадлыг бүрэн эзэмшсэн бөгөөд 2 жилийн хугацаанд 337.9 сая ам.долларын бүтээгдэхүүн үйлдвэрлэж, хөрөнгө оруулалтаа бүрэн нөхөж чадсан байна.
Тус үйлдвэр анх 1978 оны 12 дугаар сард жилдээ 4 сая тонн хүдэр боловсруулах хүчин чадалтайгаар ашиглалтад орж байсан бол 2024 онд ийнхүү 40 сая тоннд хүрч байна.
