Аж үйлдвэр, эрдэс баялгийн яам 2024 онд

Аж үйлдвэр, эрдэс баялгийн яам гадаадын хөрөнгө оруулалтыг татах, хөрөнгө оруулагчдын эрх ашгийг хамгаалах, тэдэнд таатай орчин нөхцлийг бүрдүүлэх чиглэлээр болон хууль эрхзүйн хүрээнд авч хэрэгжүүлж буй бодлого, шийдвэр, арга хэмжээг олон улсад сурталчилан таниулахад анхаарал хандуулан ажиллаж байна.

Аж үйлдвэр, эрдэс баялгийн яам өнгөрсөн хугацаанд БНХАУ, ОХУ, АНУ, Англи, Канад, Австрали, БНЭУ, ХБНГУ зэрэг гадаадын болон Олон улсын байгууллагаас Монгол Улсад суугаа Элчин сайдууд, гадаадын хөрөнгө оруулалттай компаниудын төлөөлөгчидтэй 23 удаагийн уулзалт хийж, хоёр талын хамтын ажиллагааны боломжууд, шийдвэрлэх асуудлууд, цаашид хэрэгжүүлэх санал санаачилгуудыг ярилцлаа.

Австралийн Сидней хотноо 2024 оны 10 дугаар сарын 29-31-ны өдрүүдэд зохион байгуулагдсан “Олон улсын уул уурхай, эрдэс баялгийн чуулга уулзалт (IMARC-2024)”-д оролцлов. Энэ үеэр Монгол Улсын Засгийн газраас аж үйлдвэр, эрдэс баялгийн салбарт баримталж буй бодлого, хөрөнгө оруулалтын орчныг сурталчлан таниулсан 90 минутын тусгай бага хурлыг “Монголын худалдаа, хөрөнгө оруулалтын боломжууд” сэдвийн хүрээнд зохион байгууллаа.

БНХАУ-ын Шанхай хотноо зохион байгуулагдсан “Хятадын олон улсын импортын үзэсгэлэн (CIIE-2024)”-д оролцож, ажиллалаа. Монголын уул уурхайн салбар, хөрөнгө оруулалт шаардлагатай төслүүдийн мэдээллийг хүргэж, ирэх жил зохион байгуулах “Уул уурхайн долоо хоног (Mining week-2025)” арга хэмжээг хөрөнгө оруулагчдад танилцууллаа.

Монгол Улсын уул уурхай, эрдэс баялгийн салбарыг хөрөнгө оруулагчдад сурталчлах зорилго бүхий “Уул уурхайн долоо хоног–2024 (Mining week)” олон улсын чуулга уулзалтыг Налайх дүүрэгт зохион байгууллаа.