ЭМГЭНЭЛ ТОГТУУНБАЯРЫН НАРАНТҮВШИН /1996-2025 он/

Аж үйлдвэр, эрдэс баялгийн яамны Хяналт-шинжилгээ, үнэлгээ, дотоод аудитын газрын мэргэжилтэн, бидний хамтран зүтгэгч Тогтуунбаярын Нарантүвшин 2025 оны 3 дугаар сарын 13-ны өдөр зуурдаар таалал төгсөж, бид бүхэнд хүнд гарз тохиолоо.

Т.Нарантүвшин нь 1996 оны 12 дугаар сарын 01-ний өдөр Улаанбаатар хотод Г.Тогтуунбаярын ууган охин болон мэндэлжээ. Тэрээр Өвөрхангай аймгийн Арвайхээр сумын Улсын тэргүүний 1 дүгээр цэцэрлэгт, 2014 онд Өвөрхангай аймгийн Арвайхээр сумын Улсын Тэргүүний Мэргэд цогцолбор сургуулийг төгссөн. Улмаар 2014-2019 онд Монгол Улсын Их сургуулийн Хууль зүйн сургуулийг Эрх зүйч мэргэжлээр, 2020-2023 онд Хүмүүнлэгийн ухааны их сургуулийг Англи хэлний орчуулагч мэргэжлээр тус тус амжилттай суралцан төгссөн. 

Т.Нарантүвшин нь 2021 оноос Хан-Уул дүүргийн Иргэний хэргийн анхан шатны шүүхэд шүүх хуралдааны нарийн бичгийн дарга, шүүгчийн туслахаар ажлын гараагаа эхэлж, 2023 оноос Монгол Улсын Дээд шүүхэд ерөнхий шүүгчийн ажлын албаны нарийн бичгийн дарга, Байгаль орчин, аялал жуулчлалын яамны Хуулийн хэлтэст мэргэжилтэн, 2024 оны 02 дугаар сараас 11 дүгээр сард Уул уурхай, хүнд үйлдвэрийн яамны Хуулийн хэлтэст мэргэжилтэн, мөн оны 11 дүгээр сараас эхлэн Аж үйлдвэр, эрдэс баялгийн яамны Хяналт-шинжилгээ, үнэлгээ, дотоод аудитын газрын мэргэжилтнээр тус тус ажиллаж байв.

Т.Нарантүвшин хүнлэг энэрэнгүй, чин шударга, ажил мэргэжилдээ дуртай, хариуцлагатай, ажил хэрэгч, сурч мэдэх гэсэн хүсэл тэмүүлэл дүүрэн, анд нөхөд, хамтран ажиллагсад, ойр дотнынхондоо нэр хүндтэй, бахархал дүүрэн нэгэн маань байлаа.

Талийгаачийн хөдөлмөрч хичээнгүй, үнэнч шударга, оюунлаг эрхэм нандин чанар, эгэл даруу, эелдэг, нөхөрсөг, цовоо сэргэлэн гэгээн дүр бид бүхний зүрх сэтгэлд үүрд мөнхрөн үлдэх болно.

Түүний аав ээж, гэр бүл, төрөл төрөгсдөд Аж үйлдвэр, эрдэс баялгийн яамны нийт хамт олны зүгээс гүн эмгэнэл илэрхийлье.

Ум сайн амгалан болтугай.

АЖ ҮЙЛДВЭР, ЭРДЭС БАЯЛГИЙН ЯАМ