УЛСЫН ОНЦГОЙ КОМИССЫН III ХУРАЛДААНААР ӨВЛӨЛЖИЛТИЙН БЭЛТГЭЛ, ЭРЧИМ ХҮЧ, ГАЗРЫН ТОСНЫ ХАНГАМЖИЙГ ХЭЛЭЛЦЭВ
Улсын онцгой комиссын III хуралдаанаар 2025-2026 оны өвөлжилтийн бэлтгэл, хөдөө аж ахуй, эрчим хүчний салбарын явц, газрын тосны бүтээгдэхүүний хангамж болон холбогдох асуудлыг хэлэлцэн шийдвэр гаргалаа.
Шадар сайд С.Амарсайхан түлш шатахууны тасалдал, үнийн хөөргөдлөөс сэргийлж, аймаг, сумдын шатахуун түгээх станцуудад тасралтгүй нийлүүлэлт хангахыг үүрэг болголоо.
Бэлчээрийн ногоон өвсийг хадаж, экспортлохыг хориглож, өвс тэжээлийг дотооддоо шаардлагатай газруудад хүртээхээр шийдвэрлэв. Мал оторлох, бүртгэл, гоц халдварт өвчнөөс сэргийлэхэд анхаарахыг даалгалаа.
Хадлан тэжээл бэлтгэх бүс нутгийг хамгаалж, мал оторлох зохицуулалт хийхийг ХХААХҮ-ийн сайдад даалгав.
Сургууль, цэцэрлэгийн бүтээн байгуулалт, засварыг чанартай гүйцэтгэхийг холбогдох байгууллагуудад үүрэг болголоо.
Эрүүл мэндийн салбарт томуу, улаан бурханаас урьдчилан сэргийлэх, дархлаажуулах ажлыг эрчимжүүлнэ.
Нийслэлийн махны нөөц бүрдүүлэх, үнийн хөөргөдөл, хомсдол үүсгэхгүй байх чиглэлийг Нийслэл болон ХХААХҮ-ийн сайдад өглөө.