ХЯТАДЫН АЗИЙН ЭДИЙН ЗАСГИЙН ХӨГЖЛИЙН АССОЦИАЦИЙН ТӨЛӨӨЛӨГЧДИЙГ ХҮЛЭЭН АВЧ УУЛЗЛАА

Аж үйлдвэр, эрдэс баялгийн сайд Г.Дамдинням Бүгд Найрамдах Хятад Ард Улсын Азийн эдийн засгийн хөгжлийн ассоциацийн төлөөлөгчдийг хүлээн авч уулзав.

Уулзалтын эхэнд сайд Г.Дамдинням хоёр улсын найрсаг харилцаа, хамтын ажиллагаа тогтвортой хөгжиж буйг тэмдэглээд цаашид уул уурхайн салбарын хамтын ажиллагааг өргөжүүлэх талаар байр сууриа илэрхийлэв.

Ассоциацийн ерөнхийлөгч Чуэнь Шүн Жи үйл ажиллагааны чиглэлийн талаар танилцуулахдаа, тус холбоо нь улсын хэмжээний олон нийтийн төрийн бус байгууллага бөгөөд байгуулагдсан цагаасаа хойш “Бүс ба Зам” санаачилгыг идэвхтэй дэмжиж, Ази тив болон “Бүс ба Зам”-ын дагуух орнуудын эдийн засаг, соёлын харилцаа, хамтын ажиллагааг хөгжүүлж ирснийг онцлов.

Мөн энэхүү уулзалт нь хоёр улсын худалдаа, эдийн засгийн хамтын ажиллагаанд шинэ боломж, стратегийн түншлэлийн шинэ хуудсыг нээхэд чухал хувь нэмэр оруулна гэдэгт итгэлтэй байгаагаа хэллээ.

Сайд Г.Дамдинням уулзалтын төгсгөлд төлөөлөгчдөд талархал илэрхийлж, Монгол Улсад уул уурхайн салбарт хөрөнгө оруулалт хийх, Үйлдвэрлэл, технологийн паркийн төслүүдэд хамтран ажиллах нь нээлттэй гэдгийг онцлон тэмдэглэв.

Мөн ирэх есдүгээр сард Монгол Улсад болох “Уул уурхайн долоо хоног” арга хэмжээнд Хятадын хөрөнгө оруулагчдыг өргөнөөр оролцохыг урилаа.