АЖ ҮЙЛДВЭР, ЭРДЭС БАЯЛГИЙН САЙД Г.ДАМДИННЯМ “XCALIBUR” КОМПАНИЙН ТӨЛӨӨЛӨГЧИДТЭЙ УУЛЗЛАА
Аж үйлдвэр, эрдэс баялгийн сайд Г.Дамдинням Монгол Улсад агаарын геофизикийн судалгааны ажил гүйцэтгэж буй “XCalibur” компанийн төлөөлөгчидтэй уулзав.
Уулзалтаар талуудын тохиролцооны дагуу 2025 оны ажлыг чанартай хэрэгжүүлэх, олон улсын дэвшилтэт технологийг нутагшуулах, мэргэжилтнүүдийг чадавхжуулах, судалгааны арга, аргачлал, стандартыг боловсронгуй болгон сайжруулахад дэмжлэг үзүүлэх, цаашид хэрэгжүүлэх ажлын талаар санал солилцов.
Монгол Улсын “Алсын хараа-2050” хөгжлийн бодлогын хүрээнд агаарын геофизикийн төслийг 2024 оноос хэрэгжүүлж эхэлсэн. Тус төсөл нь ашигт малтмалыг нээн илрүүлэх, хэтийн төлөвийг тодорхойлох, том талбайн гүний мэдээллийг бага зардлаар бүрдүүлэх зорилготой юм.
Мөн Монгол орны өмнөд бүсийн 202 мянган км.кв талбайг хамарсан уг судалгааг АҮЭБЯ, ҮГА-ны захиалгаар “XCalibur” компанитай хамтран гүйцэтгэж байгаа бөгөөд геологийн судалгааг эрчимжүүлж, эрдэс баялгийн нөөцийг нэмэгдүүлэхэд чиглэж байгаа аж.
Уулзалтын төгсгөлд, тус компанийн зүгээс олон улсын геологи, геофизикийн судалгаанд нэвтэрсэн соронзон, цахилгаан-соронзон, радиометрийн арга, аргачлалыг ашиглан ашигт малтмалын хэтийн төлөвтэй талбай ялгах болон бусад салбарт ашиглах чухал мэдээллийг бүрдүүлэх зэрэг ач холбогдолтойг онцоллоо.