АҮЭБ-ИЙН САЙД Г.ДАМДИННЯМ БНТУ-ЫН ЭЛЧИН САЙДЫГ ХҮЛЭЭН АВЧ УУЛЗЛАА

Аж үйлдвэр, эрдэс баялгийн сайд Г.Дамдинням БНТУ-аас Монгол Улсад суух Элчин сайд хатагтай Башак Гэнч Юксэлийг хүлээн авч уулзлаа.

Уулзалтын үеэр талууд аж үйлдвэр, уул уурхайн салбарт хамтран ажиллах тухай хоёр орны төрийн тэргүүний түвшний тохиролцооны хэрэгжилтийг хангах, Геологи хайгуулын салбарт хамтын ажиллагааг өргөжүүлэх, хөрөнгө оруулалтыг нэмэгдүүлэх, хувийн хэвшлийнхний хооронд холбоо тогтоох асуудлаар санал солилцов.

Элчин сайд Башак Гэнч Юксэл энэ үеэр хоёр орны ахан дүүсийн найрсаг харилцааг онцлон, аж үйлдвэр, уул уурхайн салбарын төсөл хөтөлбөрүүдийг хамтран хэрэгжүүлэхэд дэмжлэг үзүүлэхээ илэрхийлэв.

Сайд Г.Дамдинням хэлэхдээ Ашигт малтмалын тухай хуульд нэмэлт өөрчлөлт оруулснаар хөрөнгө оруулагчдад илүү нээлттэй боломж бүрдэж буйг дурдлаа. Түүнчлэн аж үйлдвэрийн хөгжил, нэмүү өртөг шингэсэн үйлдвэрлэл, геологи хайгуулын салбарт гадаадын хөрөнгө оруулалт татах чиглэлд Турк улстай хамтран ажиллах хүсэлтэй байгаагаа илэрхийлэв.

Мөн ирэх есдүгээр сард Монгол Улсад зохион байгуулагдах “Mining Week, MinePro” үзэсгэлэнд Туркийн аж ахуйн нэгжүүдийг өргөнөөр оролцохыг урилаа.