АҮЭБ-ИЙН САЙД Г.ДАМДИННЯМ: ЗӨВХӨН ОЛБОРЛОЛТОД БУС НЭМҮҮ ӨРТӨГ ШИНГЭСЭН ҮЙЛДВЭРЛЭЛ, ДЭД БҮТЭЦ, ТЕХНОЛОГИЙН ШИНЭЧЛЭЛД ЧИГЛЭСЭН ХӨРӨНГӨ ОРУУЛАЛТЫГ ДЭМЖИХ БОДЛОГО БАРИМТАЛНА
Аж үйлдвэр эрдэс баялгийн сайд Г.Дамдинням БНХАУ-д хийж буй айлчлал хоёр дахь өдрөө /2026.01.16/ үргэлжилж байна. Албан ёсны айлчлалын хүрээнд Санхүүгийн зохицуулах хорооны санаачилгаар зохион байгуулагдаж буй “Монголын Хөрөнгийн Зах Зээлийг Холбох нь: Бээжин “Хөрөнгө оруулалт ба Уул уурхай” арга хэмжээнд оролцоо. Энэхүү арга хэмжээнд БНХАУ-аас 100 гаруй бизнесийн байгууллагын төлөөлөл, Монгол улсын уул уурхайн салбарын 50 гаруй аж ахуйн нэгж оролцож байна.
Сайд Г.Дамдинням хэлсэн үгэндээ “Монгол Улс бол эрдэс баялаг, аж үйлдвэр, эрчим хүч, дэд бүтэц зэрэг салбарт асар их боломж бүхий улс болохыг дурьдаад манай улсын эдийн засгийн өсөлтийн тулгуур нь уул уурхай ба түүнийг дагасан боловсруулах үйлдвэрлэл бөгөөд эдгээр салбарыг урт хугацааны, тогтвортой, ил тод санхүүжилтийн эх үүсвэрээр хангах нь Монгол Улсын хөгжлийн бодлогын чухал зорилт болохыг онцлов. Мөн тэрбээр Монгол Улсын Засгийн газар уул уурхай, аж үйлдвэрийн салбарт зөвхөн олборлолтод бус, нэмүү өртөг шингэсэн үйлдвэрлэл, дэд бүтэц, технологийн шинэчлэлд чиглэсэн хөрөнгө оруулалтыг дэмжих бодлогыг баримталж, ийм хөрөнгө оруулалтыг татах хамгийн үр ашигтай суваг бол хөрөнгийн зах зээл гэдэгт бид итгэлтэй байна гэлээ.
Түүнчлэн Монгол Улсын хөрөнгийн зах зээл сүүлийн жилүүдэд эрчимтэй хөгжиж, хөгжлийн шинэ шатанд гарч байгаагаас үүдэн зах зээлийн үнэлгээ, арилжааны хэмжээ тогтмол өсөж, хувьцаа, бондын зах зээл, ногоон болон тогтвортой санхүүжилтийн хэрэгслүүд бодитоор хөгжихийн зэрэгцээ төрөөс салбарын зохицуулалтын орчныг олон улсын жишигт нийцүүлэх, ил тод байдал, засаглалыг сайжруулах томоохон шинэчлэлүүдийг хийж байна. Мөн Монгол Улс уул уурхайн бүтээгдэхүүний арилжааг зах зээлийн зарчимд шилжүүлэх, ил тод байдлыг нэмэгдүүлэх чиглэлээр бодит ахиц дэвшил гаргаж, уул уурхайн бүтээгдэхүүний биржийн тогтолцоог нэвтрүүлснээр нүүрс, зэс болон бусад стратегийн түүхий эдийн үнийн ил тод байдал сайжирч, зах зээлийн жишиг үнэ тогтоох, логистик болон төлбөр тооцооны эрсдэлийг бууруулах чухал суурь бүрдсэнтөдийгүй цаашид энэхүү биржийн тогтолцоог олон улсын хөрөнгийн болон деривативын зах зээлтэй уялдуулах нь бидний бодлогын дараагийн чухал зорилт юм.
Монгол Улс нь БНХАУ-ын ойрын хөрш, стратегийн түнш бөгөөд бидний эдийн засаг харилцан уялдаатай, харилцан ашигтай байдлаар хөгжиж ирсэн. Ялангуяа уул уурхай, эрчим хүч, дэд бүтцийн салбарт Хятадын хөрөнгө оруулалт, зах зээлийн оролцоо чухал үүрэг гүйцэтгэж ирсэн билээ. Монгол Улсын Засгийн газраас ашигт малтмалын салбарыг олборлолтоос боловсруулах салбарт шилжүүлэхээр зорьж томоохон төслүүдийг хэрэгжүүлэхээр бэлтгэл ажлыг ханган Хүнд үйлдвэрийн тухай, Ашигт малтмалын тухай хууль болон зарим холбогдох хуулиудад нэмэлт, өөрчлөлт оруулах замаар эрх зүйн орчныг шинэчилж байна. Ингэснээр аж үйлдвэрийн салбарт хамтран хэрэгжүүлэх боломжтой зэс хайлуулах, ган бүтээгдэхүүн үйлдвэрлэх, нүүрс хийжүүлэх, алт цэвэршүүлж боловсруулах үйлдвэрийн салбарт хөрөнгө оруулалтыг татахаар олон улсын хөрөнгө оруулагч нарыг урихаар бэлтгэж байгаа ба БНХАУ-ын хөрөнгө оруулагч нарыг эдгээр том бүтээн байгуулалтын төсөлд оролцох боломжтойг дуулгахад таатай байна гэв. Эцэст тэрбээр Монгол Улс хөрөнгийн зах зээл, уул уурхайн салбарын уялдааг шинэ шатанд гаргах, бүс нутгийн болон олон улсын зах зээлтэй илүү нээлттэй, уян хатан, өрсөлдөх чадвартайгаар холбогдох бүрэн боломжтой гэж бид үзэж байгаагаа дурьдаад тус арга хэмжээ нь энэхүү зорилгын эхлэл болж, бодит хамтын ажиллагаа, шинэ санаачилга, харилцан ашигтай түншлэлийн суурийг тавина гэдэгт итгэлтэй байна гээд арга хэмжээнд амжилт хүслээ.
