ЭМГЭНЭЛ
ЧУЛУУНХҮҮГИЙН ЭНХ-АМГАЛАН (1970-2023)
Бидний дотны нөхөр, Монгол Улсын Зөвлөх геологич, “Жем проспектор Монголиа” ХХК-ийн захирал Чулуунхүүгийн Энх-Амгалан 2023 оны 8 дугаар сарын 30-ны өдөр тэнгэрийн орноо дэвшиж, Монгол Улсын геологи-эрдэс баялгийн салбарт нөхөж баршгүй хүнд гарз тохиолоо.
Ч.Энх-Амгалан нь 1970 онд Улаанбаатар хотноо мэндэлж, 1987 онд Нийслэлийн 47-р дунд сургууль, 1995 онд ЗХУ-ын (хуучин нэрээр) Эрхүү хотын Политехникийн дээд сургуулийг ашигт малтмалын хайгуулын геологич мэргэжлээр төгссөн, Монгол Улсын зөвлөх геологич байлаа.
Талийгаач нь ажлын гараагаа 1994 оноос “АМО” ХХК-д геологич инженерээр эхлүүлж, 2000-2002 онд “Каскадиа энд кемикалз корпорейшн” ХХК-д хайгуулын геологич, 2003 онд “Кью жи экс” ХХК-д хайгуулын геологич, 2004-2007 онд “Сентерра гоулд Монголиа” ХХК-д төслийн геологич, төслийн удирдагч, 2007-2010 онд “Алтан рио монголиа” ХХК-д хайгуул эрхэлсэн захирал, 2010 оноос “Жем проспекторс Монголиа” ХХК-ийг үүсгэн байгуулж, захиралаар тус тус ажиллаж, геологи-эрдэс баялгийн салбарт амьдралынхаа 30 гаруй жилийг зориулсан эрхэм хүмүүн, дотны анд маань байлаа.
Тэрээр салбартаа манлайлан ажиллах хугацаандаа Хойд Хэнтийн Бороо-Зуунмодны алтны хүдрийн дүүрэгт гүйцэтгэсэн эрэл-хайгуулын ажлыг орчин үеийн арга аргачлал, чанарын өндөр түвшинд удирдан гүйцэтгэж, эх орныхоо эрдэс баялгийн санг 50 гаруй тонн алтны нөөцөөр өсгөн баяжуулж, үнэтэй хувь нэмрийг оруулсан манай салбарын тэргүүлэх мэргэжилтний нэг байсан юм.
Түүний геологчийн замнал зөвхөн Монгол орноор хязгаарлагдалгүй, хилийн чанадад ч эрдэс баялгийн эрэл хайгуулыг амжилттай гүйцэтгэсэн түүхтэй. Тухайлбал АНУ-ын Невада мужийн интрузивтэй холбоотой зэс порфир, скарны төрлийн Венус, Жанго хиллз, их сульфидтай алт-мөнгөний хүдэржилттэй Радар, карлин төрлийн алтны хүдэржилттэй Рен төслүүдэд хайгуулын геологич, ахлах геологичоор ажиллаж, гадаадын мэргэжил нэгт геологичдын хайр хүндэтгэлийг хүлээсэн Монгол геологич байлаа.
Талийгаач Ч.Энх-Амгалан зөвхөн мэргэжлийн чиглэлээр бус салбарын олон нийтийн ажилд идэвхитэй оролцож, Монгол үйлдвэрлэлийн геологичдын холбоог үүсгэн байгуулагчдын нэг төдийгүй 2010-2018 онд Удирдах зөвлөлийн гишүүн, 2014-2018 онд Ерөнхийлөгчөөр тус тус сонгогдон ажиллаж байсан. Ингэхдээ Монгол Улсын геологи, эрдэс баялгийн салбарын эрхзүйн орчныг боловсронгуй болгох, мэргэжлийн холбоодын үйл ажиллагаа, гадаад, дотоод харилцааг бэхжүүлэхэд үнэтэй хувь нэмэр оруулсан.
Тэрээр Монголын геологичдын жил бүрийн уламжлалт баяр болсон “Монголын Геологи Хайгуул” чуулга уулзалтыг анхлан санаачлагчдын нэг бөгөөд тус арга хэмжээнд төрийн захиргаа, шинжлэх ухааны байгууллага, их дээд сургууль, гадаад дотоодын хөрөнгө оруулагч, төсөл хэрэгжүүлэгчдийг өргөнөөр татан оролцуулж салбарын эрх ашгийг хангасан хууль эрх зүйн болон хөрөнгө оруулалтын орчинг олон улсын жишигт нийцүүлэх, нутагшуулах тал дээр онцгой анхаарал хандуулан ажиллаж байснаас гадна олон улсын хэмжээнд Монгол Улсын эрдэс баялгийн салбарыг сурталчилан таниулсаар ирсэн юм.
Сүүлийн жилүүдэд олон улсын байгууллагуудад зөвлөхөөр ажиллаж, Монгол орны нутаг дэвсгэрийн геологи-ашигт малтмалын онцлогт нийцүүлэн голлох 30 ашигт малтмалын төрлөөр гүйцэтгэх хайгуулын аргачилсан зөвлөмжийг боловсруулах ажилд гар бие оролцсон юм.
Ч.Энх-Амгалан нь залуу геологичдыг бэлтгэх үйлсэд өөрийнхөө туршлага, мэдлэг, ур чадварыг дайчлан ажиллаж олон шавь төрүүлсэн нь Монгол болон олон улсад хүлээн зөвшөөрөгдөн ажиллаж байна.
Геологич Ч.Энх-Амгалангийн Монгол Улсын геологийн салбарт оруулсан хувь нэмрийг Засгийн газраас өндрөөр үнэлж, “Тэргүүний геологич” болон “Тэргүүний уурхайчин” хүндэт тэмдэг, “Алтангадас” одонгооор тус тус урамшуулан шагнасан.
Талийгаачийн эцэг эх, гэр бүл, үр хүүхэд, төрөл төрөгсдөд гүн эмгэнэл илэрхийлье.
УУЛ УУРХАЙ, ХҮНД ҮЙЛДВЭРИЙН ЯАМ
ҮНДЭСНИЙ ГЕОЛОГИЙН АЛБА
АШИГТ МАЛТМАЛ, ГАЗРЫН ТОСНЫ ГАЗАР
МОНГОЛЫН ҮЙЛДВЭРЛЭЛИЙН ГЕОЛОГИЧДЫН ХОЛБОО
ЖЕМ ПРОСПЕКТОРС МОНГОЛИА ХХК
МЭРГЭЖИЛ НЭГТ ХАМТ ОЛОН