Г.ДАМДИННЯМ: УЛСЫН ХЭМЖЭЭНД 18 ААН-ИЙН 22 ШАТАХУУНЫ АГУУЛАХ САВ БАРИХ АЖИЛ ХИЙГДЭЖ БАЙНА
Аж үйлдвэр, эрдэс баялгийн сайд Г.Дамдинням улсын хэмжээнд шатахуун хадгалах агуулах, савны нөөцийг нэмэгдүүлэх чиглэлээр Монгол Улсын Засгийн газрын дэмжлэгээр хэрэгжиж байгаа төслүүдийн бүтээн байгуулалтын ажлын явцтай танилцаж байна.
Энэ хүрээнд Дархан-Уул аймагт хэрэгжиж буй “Тэс Петролиум” ХХК-ийн шатахууны агуулахын өргөтгөлийн төслийн үйл ажиллагаатай танилцлаа.Монгол Улсын Засгийн газрын үйл ажиллагааны төлөвлөгөөнд 2024-2028 онд шатахууны нөөц хадгалах агуулах савны хүчин чадлыг 3-6 сараар нэмэгдүүлэх зорилт тавьсан байдаг.Энэ зорилтыг үе үеийн Засгийн газрын мөрийн хөтөлбөрт тусгаж ирсэн ч хэрэгжилт хангагдахгүй явсаар ирсэн дуусдаггүй яриа байлаа. Тус дуусдаггүй яриаг Н.Учралын Засгийн газар бодит ажил болгон хэрэгжүүлж байна.
Бид өнөөдөр “Тэс Петролиум” ХХК-ийн Дархан-Уул аймаг дахь шатахуун агуулахын өргөтгөлийн төслийн үйл ажиллагаатай танилцлаа. Тус компанийн шатахууны нөөц агуулах савны хэмжээ өмнө нь 4400 м/кубийн хүчин чадалтай байсныг 3 дахин буюу 10 мянган м/кубээр нэмэгдүүлж нийт 14400 м/кубийн хүчин чадалтай болгох ажил хийгдэж дуусах дөхөж байна.
Үүний үр дүнд Дархан-Уул аймгийн шатахуун хадгалах хүчин чадал 30 хувиар өсөж байна. Ингэснээр Сэлэнгэ, Булган, Дархан-Уул, Төв аймгуудын шатахууны хэрэгцээг хангахад бодитой ахиц гарах юм. Өмнө нь, Дархан-Уул аймаг зөвхөн төвийн бүсийн хойд хэсгийн хангалтыг хариуцаж ажилладаг байсан бол одоо Улаанбаатар хотод шатахууны дутагдал үүссэн үед нөхөх дэмжлэг үзүүлэх хүчин чадалтай болж байна.
Аж үйлдвэр, эрдэс баялгийн яамаас энэ жилдээ багтаан ААН-үүдтэй хамтран улсын хэмжээнд 150 мянган м/кубээр хадгалах савны хүчин чадлыг нэмэгдүүлж ирэх жилийн өдийд 300 мянган м/кубийн хүчин чадлыг бий болгосноор улсын хэмжээнд нэг сарын ердийн хэрэглээний шатахууны нөөцийг хадгалах чадалтай болох зорилт тавин ажиллаж байна.
Монгол Улсын Засгийн газрын шатахууны нөөцийг хадгалах хүчин чадлаа нэмэгдүүлэх энэ бодлогын хэрэгжилт тасралтгүй үргэлжилж 2028 он гэхэд улсын ердийн хэрэглээний 3 сар хүртэл хугацааны нөөцийг хадгалах чадалтай болно.Тус бүтээн байгуулалтын ажлуудыг стратегийн гол байрлалууд болох Улаанбаатар хот, Дархан-Уул аймаг, Орхон аймаг, Баян-Өлгий, Өмнөговь зэрэг аймагт хэрэгжүүлж байна. Үүний үр дүнд геополитикийн нөхцөл байдлаас болон бусад тодорхой бус байдлаас шалтгаалан гарч болох шатахууны үнийн огцом өсөлт, түр хугацааны доголдол, тасалдалттай холбоотой асуудлыг шийдвэрлэх боломжтой болох юм.
