С.Энх-Амгалан: Нүүрсний үнэ өссөнөөр шинэ хураамжуудыг тогтоож байна

Уул уурхай, хүнд үйлдвэрийн сайдын зөвлөх С.Энх-Амгалангаас нүүрсний асуудлаар тодорууллаа.

БНХАУ уурхайн бүтээгдэхүүн тэр дундаа нүүрс, зэсийн импортынхоо татварыг нэмэгдүүлсэн байна. Энэ талаар мэдээлэл өгөхгүй юу?

Хятадын ӨМӨЗО-ны Хөгжил шинэтгэлийн хорооны мэдэгдснээр Ганц модны боомтоор нэвтэрч буй нүүрсний тонн тутмаас найман юань, машин тутмаас 10 юань, үнэт металлын тонн тутмын үнэ давсан тохиолдол экспортын дүнгийн 10000 юаниас 0.2 хувийн хураамж тус тус авахаар боллоо.

Дээрх асуудалд яамны зүгээс ямар арга хэмжээ авах вэ, өөр гарц, боломж юу байна вэ, энэ талаар дэлгэрэнгүй мэдээлэл өгөхгүй юу?

Нүүрсний үнэ өндөр байх үед ӨМӨЗО-ны засаг захиргааны зүгээс иймэрхүү хэлбэрийн орон нутгийн хураамжуудыг тогтоож байсан юм билээ. Сүүлийн хэдэн жил нүүрсний үнэ унасантай холбоотойгоор хураамжуудаа цуцалсан байсан. Гэтэл нүүрсний үнэ өссөнөөр ӨМӨЗО-ны Засаг захиргааны зүгээс шинэ хураамжуудыг дахин тогтоож байна.

Өмнө нь 2014 онд 3-6 хувийн татвар ногдуулахаар нэмж байсан. Тэр үед манай талаас ямар арга хэмжээ авч байсан бэ, Энэ удаа дахиад нэмчихлээ үүнийг хэрхэн харж байна вэ?

Манай яам болон Засгийн газрын зүгээс БНХАУ-ын талд боомтыг олон улсын статустай болгох, улмаар иймэрхүү орон нутгийн зүгээс тогтоож байдаг энэ төрлийн хураамжуудын асуудлыг тэглэх талаар асуудал тавьж ярьж байгаа. Мөн нүүрсний үнийн нэг цонхны бодлогыг хэрэгжүүлэх талаар дотоодын нүүрс олборлогчидтой тодорхой ахицтай шийдлүүдийг гаргаад явж байна. Чалкогийн гэрээний хүрээнд дөрөвдүрээр улирлыг дуусахаас өмнө өнөөдрөөс (өчигдрөөс)Зүүн Цанхийн түүхий нүүрсний амны үнийг 50 ам.доллар болгож нэмэх талаар тохиролцоонд хүрсэн байгаа. Он гараад шинэ улирлын нүүрсний үнэ 60 орчим ам.долларт тогтохоор харагдаж байна. Цаашид нүүрсээ угааж экспортлосноор дэлхийн зах зээлийн үнэд нийцсэн бүтээгдхүүн экспортлох талаар тодорхой ахиц гарах боломж бололцоог бүрдүүлэхээр ажиллаж байна. Дотооддоо нүүрсээ угааж баяжуулснаар нэмүү өртөг шингээж, илүү өндөр үнэтэй экспортын бүтээгдэхүүн гаргах боложмтой гэдэг нь ойлгомжтой.

Нөгөө талаас БНХАУ импортын татвараа нэмж байгаа нь цаашид нүүрсний экспортоо нэмэгдүүлэх бодлогоор сууриа бэлдэж байна гэж харж болох уу?

Цаашид Таван толгойн хэлэлцээрийн хүрээнд тус бүлэг ордын нүүрсийг оновчтой олборлох, угааж боловсруулах, төмөр замаар тээвэрлэх, дэлхийн зах зээлийн үнэ ханшаар худалдах асуудлыг цогцоор нь шийдвэрлэх боломж бүрдэнэ. Энэ хүрээнд Гашуунсухайт боомтыг олон улсын статустай болгох асуудал, орон нутгийн чанартай шимтгэл хураамжийн асуудлуудыг нэг мөр нааштай шийдвэрлэх боломж бүрдэнэ гэж харж байна.

Эх сурвалж: Үндэсний шуудан сонин