ШУУРХАЙ ШТАБЫН ҮҮРЭГ ДААЛГАВРЫН БИЕЛЭЛТ САЙН БАЙНА
Ерөнхий сайдын захирамжаар байгуулагдсан газрын тосны бүтээгдэхүүний хангамж, нийлүүлэлтийг тогтворжуулах шуурхай штабын ээлжит хуралдаан боллоо. Хуралдааныг Аж үйлдвэр, эрдэс баялгийн сайд Г.Дамдинням удирдан зохион байгуулж, холбогдох мэдээллүүдийг сонсож, тодорхой үүрэг чиглэлүүдийг өглөө.
Наймдугаар сард Монгол улс 500 вагон АИ92 шатахуун, 1314 вагон дизель түлш хүлээн авсан байна. Өнөөдрийн байдлаар ОХУ-аас 74 вагон АИ92 ирж байгаагаас 39 вагон нь өртөөдүүдэд ирж, буулгалтын ажил үргэлжилж байна. Мөн БНХАУ-аас 80 вагон АИ92 шатахуун ирж байна. Онгоцны түлшний хувьд нийт 17 вагоныг хүлээн аваад байна.
Өнгөрсөн 24 цагийн хугацаанд гаалийн байгууллага 12920 тонн газрын тосны бүтээгдэхүүнийг Монгол улсын хилээр түргэн шуурхай нэвтрүүлж ажиллажээ.
Өнөөдөр буюу 08-р сарын 17-оос 8-р сарын 18 -нд шилжих шөнийн 00:00 цагаас үүрийн 04:00 цагийн хооронд АҮЭБ-ын сайд Г.Дамдинням тэргүүтэй АҮЭБЯ, АМГТГ, Монополын эсрэг газрын байцаагчид нийслэл хотын хэмжээнд үйл ажиллагаа явуулж байгаа бүх ШТС-уудад хяналт тавьж ажиллалаа.
Аж ахуй нэгжүүдийн зүгээс шуурхай штабын үүрэг даалгаврыг бүрэн дүүрэн хэрэгжүүлж ажиллаж байна. Гэхдээ тодорхой хэмжээнд нөөц байгаа ч түгээлт хийхгүй байсан цөөн тооны ШТС-уудад заавар зөвлөмж өгч, шатахууныг төрөл хамааралгүй, байгаа нөөцийг хэвийн олгох үүргийг тухай бүрд өгч ажиллалаа.
Түүнчлэн Монополын эсрэг газарт нефтийн бүтээгдэхүүн импортлогч, түгээгч бүх аж ахуй нэгжүүдэд хууль эрх зүйн зөвлөмж хүргүүлэх үүргийг өглөө. Тодруулбал санаатайгаар шатахууны хомсдол үүсгэсэн тохиолдолд оногдуулах хууль, эрх зүйн зохицуулалтыг нефть импортлогчдод сануулж, ард иргэдийг нефтийн бүтээгдэхүүнээр тогтвортой, найдвартай хангах гэрээний үүргээ биелүүлэн ажиллахыг АҮЭБ-ын сайд Г.Дамдинням онцоллоо.
Цаашид шатахууны түгээлтийг эрчимжүүлэх зорилгоор ШТС-ууд хэвийн ажиллаж байгаа эсэхийг шалгах шуурхай штабаас хяналт шалгалт үргэлжилнэ. Энэхүү хяналт, шалгалтад дэмжлэг үзүүлж ажиллах үүргийг шуурхай штабаас цагдаагийн байгууллагад өглөө.
Шуурхай штабын хурлын төгсгөлд иргэдийг ШТС-уудын үүдэн авто машинаа хонуутаар орхихгүй байхыг зөвлөлөө. Учир нь шөнийн цагаар тухайн ШТС орлого хүлээн авах үед орц, гарц хаагдсан байх, шатахуун олгож эхлэх үед автомашин саадгүй зорчих боломж хязгаарлагдах тохиолдлууд гарч байгааг онцоллоо.
