СУМДАД БАЙРЛАХ ШТС-УУДЫН  ШАТАХУУНЫ ХАНГАМЖИЙГ ЭРЧИМЖҮҮЛНЭ

Ерөнхий сайдын захирамжаар байгуулагдсан газрын тосны бүтээгдэхүүний хангамж, нийлүүлэлтийг тогтворжуулах шуурхай штабын ээлжит хуралдаан боллоо. Хуралдааныг Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэв удирдан зохион байгууллаа.

Өнгөрсөн 24 цагийн байдлаар Улаанбаатар хотод нийтдээ 76 вагон буюу 4560 тонн АИ92 шатахуун ирж, үүнээс Улаанбаатар хотын 218 ШТС-д 1950 тонн, орон нутгийн 56 ШТС-д 600 тонныг хүргүүлжээ.

Шуурхай штабын зүгээс шатахууны түгээлтийг эрчимжүүлэх хүрээнд ШТС-уудад 24 цагийн турш хяналт тавиж байгаа бөгөөд аж ахуй нэгжүүдийн зүгээс өгсөн үүрэг чиглэлийг бүрэн дүүрэн хэрэгжүүлэн ажиллаж байна. Цаашид сумдын ШТС-уудыг АИ92 шатахуунаар хангахад анхаарч ажиллах үүрэг чиглэлийг холбогдох байгууллагуудад өгснийг АҮЭБЯ-ны Төрийн нарийн бичгийн дарга Б.Дашпүрэв мэдээллийн үеэр онцоллоо.

АИ92 шатахууны импортын мэдээллийг танилцуулавал 2026 оны тавдугаар сарын дунд үеэс эхлээд импортын хэмжээ буурч, 06-р сард 57655 тонн, 07-р сард 47088 тонн болсон бол 08-р сарын 19-ны өдрийн байдлаар 29639 тонн АИ92 шатахууныг Монгол улс импортлон аваад байна. Энэхүү тоон мэдээллийг өнгөрсөн оны мөн үетэй харьцуулавал 06-р сард АИ92 шатахууны импорт 2025 оны түвшингээс 11 мянган тонноор, 07-р сард 30 мянган тонноор тус тус буурсан үзүүлэлттэй байна. 2026 оны 8-р сард Монгол улс ОХУ-аас нийт 50000 тонн АИ92, 15000 тонн АИ95 шатахуун худалдан авах гэрээ байгуулсныг АҮЭБ-ын сайд Г.Дамдиннямын ОХУ-д хийсэн айлчлалын үеэр АИ92 шатахууныг 25000 тонноор нэмэгдүүлээд байна.