“Discover Mоngolia” чуулга уулзалт 14 дэх жилдээ

“Discover Mоngolia” чуулга уулзалт 14 дэх жилдээ

Олон улсын уул уурхайн хөрөнгө оруулагчдын “Discover Mоngolia-2016” 14 дүгээр чуулга уулзалт “Корпорэйт конвэншин центр”-т -есдүгээр сарын 08-нд эхэллээ.

Монголын төрийн бодлого, уул уурхайн салбарын хөгжил, Монгол дахь олон улсын томоохон төслүүдийн хэрэгжилт зэрэг улсын эдийн засагтай холбоотой тоон мэдээлэл, бодит нөхцлийг гадаадын хөрөнгө оруулагчдад таниулдаг нь энэхүү чуулганы онцлог.

“Тогтвортой байдлын төлөө” уриан дор болж буй “Дисковер Монгол 2016" чуулганыг нээж Уул уурхай, хүнд үйлдвэрийн сайд Цэдэвийн Дашдорж үг хэлэв. Тэрбээр “Уул уурхай, эрдэс баялгийн салбар нь 2015 оны эцсийн байдлаар Монгол улсын ДНБ-ны 16.7 хувь, экспортын нийт бүтээгдэхүүний 87 хувь, аж үйлдвэрийн нийт бүтээгдэхүүний 55 хувийг тус тус бүрдүүлж байна. Гэвч суперциклийн үед бодлого, эрх зүйн тогтвортой байдлыг алдагдуулсан олон эрх зүйн актууд ар араасаа батлагдан гарсанаар гадаад, дотоодын хөрөнгө оруулагчдад ойлгомжгүй байдал, хүлээлтийг бий болгосон.

Ирэх он жилүүдэд уул уурхайн салбарын бодлого нь судалгаа, шинжилгээнд суурилан, хөрөнгө оруулалтын тогтвортой орчныг бүрдүүлэхийн төлөө Монгол улсын Засгийн газар, Уул уурхай, Хүнд үйлдвэрийн яам ажиллах болно” гэв.

Чуулганы эхний өдрийн үдээс өмнө “Эрдэнэс Монгол” компанийн Гүйцэтгэх захирал Б.Бямбасайхан, “Оюутолгой” компанийн ТУЗ-ийн дарга Г.Батсүх, “Энержи Ресурс” компанийн Гүйцэтгэх захирал Г.Батцэнгэл, “Эрдэнэ Ресурс девелопмент” компанийн Гүйцэтгэх захирал Петер Акерли нар Монгол улсын уул уурхайн салбарт дахь өнгөрсөн он жилүүдийн туршлага, алдаа онооны талаар илтгэл тавьсан юм.

"Өнгөрсөн найман жилийн хугацаанд монголчууд бид маш өндөр үнэ, төлөөсөөр сургамж авлаа. Нэгдсэн, тогтвортой бодлогогүй явж ирлээ. Экспортын гол бүтээгдэхүүн нүүрс, төмрийн хүдрийн олборлогчид дэд бүтэц, зах зээл, боловсон хүчнээ булаацалдан дотроо учир зүйгээ ололцож чадаагүй. Гэхдээ дараагийн өсөлт ирнэ. Тэрхүү өсөлтөд бодлогоо бэлдье. Бодлогоороо нэгдэе. Тэрхүү бодлого зөв байх юм бол бизнес явах болно” хэмээн “Энержи Ресурс” компанийн Гүйцэтгэх захирал Г.Батцэнгэл “Азийн эдийн засгийн өсөлт – Монголын коксжих нүүрс болон төмрийн хүдрийн экспортын боломж” илтгэлдээ дурдсан юм.

Чуулганы эхний өдрийн үдээс хойших хуралдаан “Уул уурхайн салбарт нөлөөлөх макро хүчин зүйлс”, “Санхүүгийн салбарын тогтвортой хөгжил”, “Хайгуул ашиглалтын төслүүд”сэдвээрүргэлжиллээ. Тус чуулга уулзалт, үзэсгэлэнгийн арга хэмжээний зочид, төлөөлөгч, ивээн тэтгэгч компаниудын тоо өмнөх жилээс буурсан боловч энэ жилээс эргэн сэргэх хандлагатай байна.