Аж үйлдвэр, Эрдэс баялгийн сайд Ц.Туваан Монгол-Солонгосын ирээдүйн стратегийн форумд оролцлоо
Салбарын сайд Ц.Туваан “Монгол-Солонгосын Ирээдүйн стратегийн форум”-д хүрэлцэн ирсэн зочид төлөөлөгчдөд мэндчилгээ дэвшүүлж, Монгол Улс БНСУ 1990 онд дипломат харилцаа тогтоосноос хойш 30 гаруй жилийн хугацаанд хоёр улсын харилцаа, хамтын ажиллагаа “Стратегийн түншлэл”-ийн хүрээнд өргөжин тэлж буйд талархалтай буйгаа илэрхийлэв.
Аж үйлдвэр, Эрдэс баялгийн сайд Ц.Туваан нээлтийн үгтээ Монгол Улсын Засгийн газраас аж үйлдвэрийг хөгжүүлэх, нэмүү өртөг шингэсэн бүтээгдэхүүн үйлдвэрлэл болон эрдэс баялгийн боловсруулалтад тэргүүлэх ач холбогдол өгч байгааг онцлон УИХ-ын сонгуулийн үр дүнд байгуулагдсан хамтарсан Засгийн газар Аж үйлдвэр, Эрдэс баялгийн яамыг шинээр байгуулсныг тэмдэглэв.
БНСУ нь хагас дамжуулагч, усан онгоц, автомашин, сэлбэг хэрэгсэл, үүрэн телефоны үйлчилгээгээр дэлхийд тэргүүлэгч улсуудын нэг бол Монгол Улс байгалийн баялаг, хөдөө аж ахуй, мал аж ахуйн гаралтай бүтээгдэхүүн, түүхий эдийн арвин баялаг нөөцтэй орон юм. Бид энэхүү давуу байдлыг ашиглан, харилцан ашигтай хамтын ажиллагааг хөгжүүлэх боломжтой гээд, Монгол Улс, БНСУ-тай “Газрын ховор металлын хамтарсан судалгааны төв” байгуулах” төслийг хэрэгжүүлж байгааг онцлов.
Түүнчлэн Монгол Улсын урт хугацааны хөгжлийн бодлого “Алсын хараа-2050” баримт бичгийн 2030 он хүртэлх үйл ажиллагааны төлөвлөгөөнд манай улс ховор металлын хайгуул, судалгааны ажлыг эрчимжүүлэх талаар тусгагдсан бөгөөд энэ зорилтод хүрэхэд томоохон түлхэц болох бөгөөд энэхүү төслийг хэрэгжүүлснээр ховор металлын хайгуул, судалгааны ажлыг эрчимжүүлэх, нэмүү өртөг шингэсэн уул уурхайн бүтээгдэхүүн үйлдвэрлэхэд чиглэсэн баяжуулах лаборатори байгуулах, мэргэжилтэн боловсон хүчний ур чадавхыг дээшлүүлэх, магистр докторт суралцуулах боломжийг бүрдүүлэх ач холбогдолтой гэв.
Аж үйлдвэр, эрдэс баялгийн яам цаашид Монгол, Солонгос хоёр орны хамтын ажиллагааны механизм болох энэхүү хороогоор дамжуулан хоёр орны аж үйлдвэр, эрдэс баялгийн салбарын хамтын ажиллагааны чиглэлийг тодорхойлох, харилцан ашигтай хамтарсан төсөл, хөтөлбөр хэрэгжүүлэх, шинжлэх ухааны үндэслэлтэй, эдийн засгийн нарийн тооцоолол, техник технологийн шинэ шийдэл, инновац шингэсэн, байгаль орчинд ээлтэй, бодит үр дүнгээ өгөх төслийн санал, судалгааны ажлуудыг дэмжиж, төрийн болон хувийн хэвшлийн байгууллага хооронд харилцаа холбоо тогтоох, мэдээлэл, туршлага солилцох, мэргэжилтэн эксперт бэлтгэх чиглэлээр хамтарч ажиллахад бэлэн байгаагаа илэрхийлэв.
#Аж_үйлдвэр_Эрдэс_баялгийн_яам