Дорнын эдийн засгийн чуулга уулзалтын үеэр Монголд шатахуун нийлүүлэх чиглэлээр тодорхой үр дүнд хүрлээ

Монгол Улсын Ерөнхий сайд Н.Учрал, Аж үйлдвэр, эрдэс баялгийн сайд Г.Дамдинням, Зам тээврийн хөгжлийн сайд Б.Дэлгэрсайхан, Эрчим хүчний сайд Б.Найдалаа тэргүүтэй засгийн төлөөлөгчид ОХУ-ын Владивосток хотноо зохион байгуулагдсан Дорнын эдийн засгийн XI чуулга уулзалтанд оролцлоо.

Энэ үеэр Монгол Улсын шатахууны хангамжийг тогтворжуулах, нийлүүлэлтийн эрсдэлийг бууруулах чиглэлээр ОХУ-ын холбогдох албан тушаалтан, нефтийн бүтээгдэхүүн үйлдвэрлэгч, тээвэр логистикийн байгууллагын удирдлагуудтай ажил хэрэгч уулзалтуудыг хийлээ.

Чуулга уулзалтын хүрээнд 2026 оны 9 дүгээр сарын 02-ны өдөр Ерөнхий сайд Н.Учрал ОХУ-ын Ерөнхийлөгч В.В.Путинд бараалхсан бол үргэлжлүүлэн ОХУ-ын Шадар сайд Алексей Леонидович Оверчук, Эрчим хүчний сайд Сергей Евгеньевич Цивилёв, Байгалийн нөөц, экологийн сайд Александр Александрович Козлов, “Роснефть” компанийн гүйцэтгэх захирал бөгөөд ТУЗ-ийн дарга Игорь Иванович Сечин, “Газпром нефть” компанийн гүйцэтгэх захирал бөгөөд ТУЗ-ийн дарга Александр Владимирович Дюков, “Оросын төмөр зам” /РЖД/ компанийн гүйцэтгэх захирал бөгөөд ТУЗ-ийн дарга Олег Валентинович Белозёров нартай уулзаж, Монгол Улсын шатахууны хангамж, нефтийн бүтээгдэхүүний импорт, тээвэр ложистикийн асуудлаар санал солилцсон байна.

ШАТАХУУНЫ НИЙЛҮҮЛЭЛТИЙГ НЭМЭГДҮҮЛЖ, ӨВЛИЙН ДИЗЕЛЬ ТҮЛШНИЙ ХАНГАМЖИЙГ ТОГТВОРЖУУЛНА

ОХУ-ын дотоодын газрын тосны бүтээгдэхүүний зах зээлд тодорхой хүндрэл үүссэн нөхцөлд Монгол Улсад нийлүүлэх шатахууны хэмжээг тогтвортой байлгах асуудлыг Оросын талд тавьж, хамтын ажиллагааг үргэлжлүүлэхээр тохиролцлоо.

Тухайлбал, есдүгээр сараас автобензины нийлүүлэлтийг нэмэгдүүлэх, аравдугаар сараас өвлийн дизель түлшний нийлүүлэлтийг тогтвортой хангах чиглэлээр хамтран ажиллахаар тохиролцсон байна.

Мөн тавдугаар сараас хойш тасалдаад байсан онгоцны түлшний нийлүүлэлтийг есдүгээр сараас сэргээж, Монгол Улсын дотоодын хэрэгцээг хангах чиглэлээр ажиллахаар болсон байна.

ОХУ-ын Эрчим хүчний сайд С.Е.Цивилёв Монгол Улсын нефтийн бүтээгдэхүүний хангамжийг тогтвортой хадгалах, нийлүүлэлтийг тасалдуулахгүй байх чиглэлээр Оросын тал анхаарч ажиллахаа илэрхийлсэн байна.

ИМПОРТЫН ЭХ ҮҮСВЭРИЙГ ТӨРӨЛЖҮҮЛЭХ ШИНЭ БОЛОМЖИЙГ СУДАЛЖ БАЙНА

Монгол Улс шатахууны импортын эх үүсвэрээ төрөлжүүлж, нийлүүлэлтийн эрсдэлийг бууруулах бодлогын хүрээнд гуравдагч улсаас газрын тосны бүтээгдэхүүн импортлох боломжийг мөн хэлэлцжээ.

Энэ хүрээнд ОХУ-ын газрын тосны бүтээгдэхүүн худалдан авч буй гуравдагч улсуудаас нэмэлт захиалга хийж, шатахууныг Владивостокийн боомтоор дамжуулан Транс-Сибирийн төмөр замаар тээвэрлэн, Наушки өртөөгөөр Монгол Улсад нийлүүлэх боломжийг судалсан байна.

Уг асуудлаар “Оросын төмөр зам” /РЖД/ компани, “Улаанбаатар төмөр зам” ХНН болон Монгол Улсын Зам, тээврийн яамны холбогдох төлөөлөлтэй санал солилцож, цаашид хэрэгжүүлэх боломжийн талаар ойлголцолд хүрсэн байна.

УРТ ХУГАЦААНЫ НИЙЛҮҮЛЭЛТИЙН ТОГТОЛЦООГ БҮРДҮҮЛНЭ

Монгол Улсын Засгийн газар шатахууны хангамжийн тогтвортой байдлыг хангахын зэрэгцээ импортын эх үүсвэрийг төрөлжүүлэх, улсын нөөцийг нэмэгдүүлэх, хадгалалтын хүчин чадлыг өргөжүүлэх чиглэлээр ажиллаж байна.

Энэ хүрээнд ОХУ-ын талтай урт хугацааны, тогтвортой нийлүүлэлтийн нөхцөлийг бүрдүүлэх, тээвэр логистикийн шинэ гарцыг ашиглах, шатахууны нөөцийн тогтолцоог бэхжүүлэх асуудлыг үе шаттайгаар хэрэгжүүлэхээр ажиллаж байна.

Ийнхүү Владивостокт болсон уулзалтуудаар Монгол Улсын шатахууны нийлүүлэлтийг богино хугацаанд тогтворжуулахын зэрэгцээ цаашид импортын эх үүсвэр, тээвэр логистикийн хувилбарыг нэмэгдүүлэх, нийлүүлэлтийн эрсдэлийг бууруулах чиглэлээр Оросын талтай тодорхой асуудлаар санал солилцлоо.