УУХҮ-ИЙН ДЭД САЙД О.БАТНАЙРАМДАЛ ЕВРОПЫН СЭРГЭЭН БОСГОЛТ, ХӨГЖЛИЙН БАНКНЫ ЭРИК ЛИВНИ ТЭРГҮҮТЭЙ ТӨЛӨӨЛӨГЧИДТЭЙ ЦАХИМ УУЛЗАЛТ ХИЙЛЭЭ

Уул уурхай, хүнд үйлдвэрийн дэд сайд О.БатнайрамдалЕвропын сэргээн босголт, хөгжлийн банкны Төв ази хариуцсан Бүс нутгийн тэргүүлэх эдийн засагч Эрик Ливниболон бусад эдийн засагч, банкир, шинжээчдийн төлөөлөлтэй цахим уулзалт хийлээ.

Уулзалтаар дэд сайд О.Батнайрамдал УУХҮЯ-ны зорилт,стратеги төлөвлөгөө, Засгийн газрын 2020-2024 оны үйл ажиллагааны хөтөлбөрт уул уурхайн салбарт хэрэгжүүлэхээр тусгагдсан томоохон ажлуудын талаар танилцууллаа. Мөн Монгол Улсын эдийн засагт чухал хувь нэмэр оруулдаг уул уурхайн голлох бүтээгдэхүүний талаар товч мэдээллэж, тэдний зүгээс сонирхсон асуултанд хариулт өглөө.

Түүнчлэн байгалийн баялаг ихтэй орнууд уул уурхайн салбараас олсон ашиг орлогоо хэрхэн оновчтой ашиглаж байгаа талаар бусад улсын тэргүүн туршлага, ялангуяа Казахстан улсын туршлагыг судлах сонирхолтой байгаагаа илэрхийлээд Үндэсний баялгийн сангийн бусад сангаас ялгагдах онцлог, үзэл баримтлал, уул уурхайн салбараас хуримтуулсан ашгийг дэд бүтцийн хөгжилд хэрхэн оновчтой ашиглах боломжийн талаар ярилцсан юм.

Ташрамд дурдахад, Европын сэргээн босголт, хөгжлийн банкнаас Монгол Улсад баримтлах 5 жилийн бодлогын баримт бичгийг боловсруулахаар төлөвлөж байгаа ба уг баримт бичиг нь тус банкнаас Монгол Улсад цаашид авч хэрэгжүүлэх арга хэмжээ, хөрөнгө оруулалтын төлөвлөгөөний суурь болох юм.